Mətbuat İcmalı

Qəzetlərin baş məqalələri müxtəlif mövzulara həsr olunub. Rəsmi qəzetlər prezident İlham Əliyevin UNESCO-da çıxışını, rəsmi sənədləri dərc edib. 

Müxalifətyönlü və müstəqil qəzetlərdə  Milli Təhlükəsizlik Nazirliyinin yüksək vəzifəli əməkdaşlarının həbsi, bu nazirlik ətrafındakı müəmmalar, neft gəlirləri, dinin siyasiləşdirilməsi  və  başqa mövzularda baş məqalələr dərc edib.

“Azadlıq” qəzeti

Qəzet bir neçə gün ölkədə yaranan İnternet kəsilməsinin səbəbləri ilə bağlı məlumat əldə etdiyini yazır. Ölkəni İnternetlə təmin edən “Delta Telekom” prezidentin şəxsi mühafizə xidmətinin rəhbəri Bəylər Əyyubovun nəzarətindədir. Bəylər Əyyubov isə “MTN işi” ilə bağlı əməliyyatlara birbaşa rəhbərlik edir. Ona görə də ehtimal etmək olar ki, bu, B.Əyyubova qarşı təxribatdır.

Sumqayıt şəhərindəki 1 və 2 saylı doğum evlərinin baş həkimləri yol verdikləri nöqsanlara görə işdən çıxarılıb.

“Cahangir Hacıyev Hacı  Məmmədovla necə görüşüb?” başlıqlı məqalədə deyilir ki, Beynəlxalq Bankın keçmiş rəhbəri Cahangir Hacıyev sabiq milli təhlükəsizlik naziri Eldar Mahmudovla quda olduqdan sonra Daxili İşlər Nazirliyinin keçmiş əməkdaşı, çoxsaylı insan ölümündə günahlandırılaraq ömürlük həbsə məhkum edilmiş Hacı Məmmədovla görüşüb. Görüş Milli Təhlükəsizlik Nazirliyinin istintaq təcridxanasında baş tutub. C.Hacıyev H. Məmmədovun vaxtilə həyat yoldaşının oğurlanmasının təfsilatını soruşub.

Məqalədə bildirilir ki, H.Məmmədovun dedikləri C.Hacıyev və E. Mahmudovun əlində rəhbərliyə qarşı vasitəolub. Bir çox məmurlar H. Məmmədovun verdiyi məlumatlar əsasında “verbovka” olunublar.

“Azərinşaat” MMC-nin yol tikintisində işləyən və neçə aydır maaş ala bilməyən 80-nə yaxın işçisi “Azəravtoyol” ASC-nin qarşısında etiraz aksiyası keçirib.

“Azərbaycan ixracında fəlakətli azalma” məqaləsində deyilir ki, son 10 ayda idxal 1,08 faiz artıb, ixrac isə 49,3 faiz azalıb.

“26-dan 2-si kəm?” məqaləsində hökumət uzvlərinin təyinatından danışılır. Məqalədə İlham Əliyevin prezidentliyi  dövründə təyin edilən və və vəzifədən azad edilən nazirlərin siyahısı verilib. “Nazirlər Kabinetinin 16 üzvü vəzifəyə İlham Əliyevin prezidentliyindən (2003-cü il) əvvəl gəlib”, - yazıda qeyd edilir.

İqtisad elmləri doktoru Qubad İbadoğlunun “Manata inam itib” məqaləsində  deyilir kİ, bu ilin ilk 6 ayında ölkədən 4,5 milyard dollardan çox vəsait çıxarılıb.

“Bunun səbəbi odur ki, kiçik və orta ölçüdə xarici investorlar Azərbaycandan qaçır, iriləri isə hazırlıq görür”, - o qeyd edib.

“Bizim Yol”

“Azəristiliktəchizat”da 76 milyon havaya sovrulub” məqaləsində deyilir ki, qurum son 5 ildə ayrılan milyonlarla vəsaiti bir neçə şirkət vasitəsi ilə xərcləyib, paytaxtda binalarda isə istilik yoxdur. Məqalədə vəsaitin ayrıldığı  şirkətlərin adları çəkilir və görülən işlərlə bağlı məlumatlar verilir.

“Azərbaycanda kriminal şəbəkələrin əllərində böyük pullar var”. Bu  barədə Bütöv Azərbaycan Xalq Cəbhəsi Partiyasının sədri Qüdrət Həsənquliyev müsahibəsində bildirir.  Onun fikrincə, AzAL-dan tutmuş Dövlət Neft Şirkətinədək hamısı özəlləşdirilməlidir.

Qəzet yazır ki, ixrac 9, neft gəlirləri  8,7 milyard dollar azalıb. Sahibkarların büdcəyə 1,4 milyard manat borcu var.

“Yeni Müsavat”

Milli təhlükəsizlik nazirinin müavini Hilal Əsədovun həyat yoldaşı Bakıdakı poliklinikaların birinin baş həkimi işləyən Nüşabə Əsədova H.Əsədovun vəzifədən azad edilməsi barədə yayılan xəbərləri təkzib edib. “Hilal Əsədov hazırda işdədir, MTN-də öz kabinetində iş başındadır”, - o qeyd edib.

Azərbaycanın Niderlanddakı səfriliyinin sabiq ataşesi, bu ölkədən sığınacaq almış Nahid Cəfərov bildirib ki, Azərbaycan hakimiyyəti  İslam Əməkdaşlıq Təşkilatının Avropa İttifaqındakı nümayəndəsi Arif Məmmədov Azərbaycan Xarici İşlər Nazilriyinin Kollegiyasında bəzi səfirlərin rüşvət verməsini  tənqid etdiyinə görə ona problemlər yaradıb. Öz növbəsində A.Məmmədov bunu təsdiq edib.  Halbuki,  indiyədək A. Məmmədov bu ilin mayında çoxsaylı insan ölümü ilə nəticələnən yanqınla bağlı məmurları tənqid edən status yazdığına görə hökumətin qəzəbinə gəldiyi bildirilirdi.

“General Elçin Əliyevlə Rəsul Quliyevin telefon danışığı-kod “28 oktyabr” məqaləsində deyilir ki, sabiq spiker R. Quliyevlə general E. Əliyevin telefon danışığını Rusiya xüsusi xidmət orqanları fiksə edib.

“Eldar Mahmudovun həbs dosyesi xüsusi komissiya tərəfindən hazırlanır”,- məqalədə  deyilir.  

“Bakı-Saray-Sumqayıt” xətti ilə işləyən 501 saylı avtobus marşrutunun sahibi Dönməz Məmmədov Gürcüstan ərazisinə keçərək orada aclıq edir. Aclığa səbəb onun sahibi olduğu  marşrutun əılindən alınaraq kənd təsərrüfatı naziri Heydər Əsədovun qohumuna verilməsidir.

“Ekspress”

Bu il dekabrın 31-dən Azərbaycanda analoq televiziya yayımı tam dayandırılacaq. Bu barədə Milli Teteradio Şurasının texniki şöbəsinin müdiri İsa Məmmədov deyib.

“Pul qıtlığı başladı?” məqaləsində  deyilir ki, manatla pul kütləsi 46,5 faiz azalıb.