Mətbuat İcmalı-23.09.13

Şənbə  və bazar günü nəşr olunan qəzetlərin əsas mövzusu prezident seçkiləri olaraq qalır. Müxalifətyönlü qəzetlərin baş məqalələri sentyabrın 22-də  Milli Şuranın prezidentliyə namizədi Cəmil Həsənlinin təşviqat mitinqinə, iqtidaryönlü qəzetlərin baş məqalələri İlham Əliyevin təbliğatına, rəsmi qəzetlər isə prezident İlham Əliyevin görüşləri, imzaladığı sənədlər və prezidentliyi dövründə ölkədəki inkişafa həsr olunur.   

Hər iki cəbhənin qəzetləri bir-birinin namizədinə və kadrlarının tənqidinə həsr edilmiş çoxsaylı yazılar da dərc edib. 

Prezident seçkiləri 

“Azadlıq” qəzeti 

22 sentyabr mitinqi ilə bağlı üçsəhifəli reportaj və bir səhifə fotolar dərc edib. 

Milli Şura ödənişli vaxtdan istifadə edəcək. Cəmil Həsənlinin seçki qərargahının həmsədri Həsən Kərimov bildirib ki, AXCP sədri Əli Kərimli və Müsavat başqanı İsa Qəmbərin ödənişli çıxışları planlaşdırılır. Ə.Kərimov  İctimai Televiziyada  1 dəqiqəlik efir vaxtının 3 min manat müəyyənləşdirilməsinə etiraz edir. 

Həbsxanalarda seçki fəallığını artırmaq üçün Penitensiar Xidmətinin rəisi Mədət Quliyev həbsxana rəislərinə xüsusi göstəriş verib. 8 saylı cəzaçəkmə müəssisəsinin rəhbərliyi həbsdə olan kriminogen aləmdə  “Lotu Quli” adı ilə tanınan  Nadir Səlifovdan seçkilərdə həbsxanaların normal iştirakı üçün kömək etməsini istəyib. 

Qəzet tanınmış vəkil Aslan İsmayılovun və keçmiş deputat Gültəkin Hacıbəylinin müsahibələrini dərc edib. Hər iki xadim seçkilərdə Cəmil Həsənlini dəstəkləyir. 

Jurnalist Pərviz Həşimlinin üzünə duran şəxs Milli Təhlükəsizlik Nazirliyin əməkdaşı olub. Jurnalistin üzünə duran Təvəkkül Qurbanovun həyat yolfdaşı MTN-nin Gənşə şöbəsində mühasib işləyir. 

Müxalifət seçkidə karusel yolu ilə səsvermənin qarşısını almaq üçün mübarizə  aparacaq. Müxalifət bir seçicinin təkrar səs verməsinin qarşısını almaq üçün ciddi müşahidə sistemindən istifadə edəcəyini bildirir. 

Həbsdə olan tanınmış hüquqşünas Qurban Məmmədov həbsxanadan Konstitusiya Məhkəməsinin sədrinə məktub yazıb. Qəzet  Məmmədovun məktubunu dərc edib. Hüquqşünas Cinayət Məcəlləsinə çoxsaylı ağırlaşdırıcı halların edilməsini pisləyir. 

Vəkil Elçin Sadıqov bildirib ki, jurnalist Pərviz Həşimlinin həbsini Milli Təhlükəsizlik Nazilriyi təşkil edib.  

Jurnalist Şahvələd Çobanoğlu “Muzdlu ABŞ şirkətinin kürü “exit poll”u  başlıqlı yazısında deyilir ki, Azərbaycanda prezident seçkilərində “exit-poll”u ABŞ-ın Arthur C.Finkelstein&Associates (AJF) şirkəti həyata keçirəcək. 

Prezidentliyə namizəd Cəmil Həsənli ilə “Bunların nəfəs aldığı hava da haramdır” başlıqlı müsahibə dərc edib. 

Göygöl qoruğunda prezident İlham Əliyev üçün villa tikildiyi yazılıb. Qəzet villanın fotosunu da yayıb.   

Azərbaycanın adı 30 milyonluq neft oğurluğunda hallanır. Rus kəşfiyyatının araşdırmalarında Azərbaycan Dövlət Xəzər Dəniz Gəmiçiliyinin adı hallanır. 

“Yeni Müsavat”

“Hakimiyyətdə “xarici qüvvə” əndişəsi”  adlı baş məqalaədə deyilir ki, qərb ölkələri rəsmi Bakıya Suriyaya gedən azərbaycanlıların seçki ərəfəsində ölkəyə qayıdıb burada təxribat törədəcəyi barədə xəbərdarlıq edib. 

Mühacirətdə olan keçmiş deputat Hüseyn Abdullayev əhalini Cəmil Həsənlini dəstəkləməyə çağırıb. 

Keçmiş deputat Gülər Əhmədova və Türkiyə klinikasında ölən Sevinc Babayeva ilə bağlı qaldırılmış cinayət işində adı keçən Türkiyə vətəndaşı Səlcuq Ağlayan hazırda Fransada mühacirətdə olan Beynəlxalq Universitetin keçmiş rektoru Elşad Abdullayevi günahlandırıb: “O, bir qadını həbs etdirdi, birinin  isə ürəyini partlatdı” Səlcuq Ağlayanın Türkiyədən çıxmasına qadağa qoyulub. 

Naxçıvanda Cəmil Həsənlinin təşviqatı əngəllənir. Təşviqat lövhələri əhalinin gediş-gəlişi az olan yerlərdə yerləşdirlib. 

Mərkəzi Seçki Komissiyasının üzvü Almaz Qəhrəmanova Qafqaz Müsəlmanları İdarəsinin sədri Allahşükür Paşazadənin dindarları İlham Əliyevə səs verməyə çağırmasının qanunazidd olduğunu bildirib. Onun sözlərinə görə, A.Paşazadə qanunu pozub. 

“Yeni Azərbaycan” 

Qəzet 7 səhifəsini İlham Əliyevin fəaliyyətinə həsr edib. Çoxsaylı məqalələr və fotolar dərc edib.

Qəzet Cəmil Həsənlinin və müxalifət liderlərinin əleyhinə məqalələr çap edib. 

YAP icra katibinin müavini Mübariz Qurbanlı Mİlli Şuranın mitinqinin alınmadığını bildirib. Onlar 20 minlik mitinq arzulayırdılar, amma mitinqə çox az adam gəlmişdi. 

“Xalq”  

Qəzet prezidentliyə namizədlərin reklamlarını dərc etməyə başlayıb. 

“Antiazərbaycan qüvvələrin seçkiqabağı bəyanatları son 20 ildə daim təkrarlanan  “bayatılardır” məqaləsi müxalifətin tənqidinə yönəlib.

“Azərbaycan”

Qəzetdə prezidentliyə namizəd Hafiz Hacıyevin pulsuz reklam yeri ağ buraxılıb.