Mətbuat-Monitorinq 03.04.14

Rəsmi qəzetlər dövlət başçısı İlham Əliyevin Qax rayonunda Alatəmir-Marsan-Tasmalı-Zəyəm-Lələli avtomobil yolunun tikintisi üçün 3-Ş8 milyon manatın ayrılması haqda sərəncamın mətnini, onun görüşlərilə bağlı xəbərləri ilk səhifələtə çıxarıblar.    

Bundan əlavə, “Azərbaycan Respublikasında informasiya cəmiyyətinin inkişafına dair 2014-2020-ci illər üçün Milli Strategiya”sının mətni də  bu qəzetlərdə əksini tapıb.

“Azadlıq” qəzeti “nurçuluq”da ittiham edilərək PA-da vəzifəsindən azad olunan Elnur Aslanova vəzifə verilməsini “hakimiyyətdə “Elnur Aslanov” müəmması” adlandıraraq manjetə çıxarıb.

Media ekspertləri KİV-lərə Dəstək Fondunun “Azadlıq” qəzetinin maliyyləşdirilməməsi haqda qərarını “qərəzli qərar”, siyasilər və cəmiyyət fəalları isə “hakimiyyətin sifarişi” adlandırıblar.

“NİDA”çı gənclərin ABŞ kəşfiyyatı tərəfindən ələ alınmaları ilə bağlı istintaqın  mövqeyinə ABŞ-ın Azərbaycan səfirliyi “belə ittihamların Azərbaycanın strateji tərəfdaşlarından biri ilə münasibətlərinə ziyan vurması” kimi şərh  edib.

AXCP fəalı Rəsul Mürsəlovun Zaqatalada evləri daşa basılıb, polis fəalın atasına cinayətkarları “incitməmək” tövsiyəsi verib.

Bakının Səməd Vurğun bağında üzərinə “aviakassa” yazılan köşklər qoymuş şəxslər bilet satışı adı ilə əhalini aldatmaqla məşğuldurlar.

Ekspertlər ölkədə idxalla satış arasında kəskin fərqin olmasını ölkəyə gələn dərman preparatlarının gömrükdə qeydiyyata düşmədən bazara daxil olması ilə izah edirlər.  

Vətəndaş cəmiyyəti institutlarının təmsilçiləri “Azəriqaz” sistemində ixtisara düşən işçilərə alternativ iş təklif olunmadığını, onların ailəni dolandırmaqdan məhrum olduqlarını nəzərə çatdırır.

“Zerkalo”  Gəncədə fəaliyyət göstərən “Kamil Vətəndaş” İctimai Birliyinin rəhbəri Həsən Hüseynlinin həbsinin əsassız olması haqda cəmiyyətdən gələn reaksiyalara geniş yer verib.

Ekspertlər Ukrayna hadisələrindən sonra Qərbin Azərbaycan qazına olan yüksək marağına Azərbaycan-Rusiya müstəvisindən yanaşaraq “bunun Azərbaycana yaxşı heç nə vəd etmədiyini” bildiriblər.

“Ekspress”  Hərbi Dəniz Qüvvələri sistemində aparılan yoxlamaların ciddi nöqsanlar aşkarladığı və 6 hərbçinin həbsə alındığını ön plana çıxarıb.

“Exo” ekspertlərə istinadən Türkiyənin baş naziri Ərdoğanın Azərbaycana gözlənilən səfərinin Rusiya-Qərb qarşıdurması ilə bağlı olması xəbərini önə çəkib.

Qəzet ekspertlərə istinadən Azərbaycanda ancaq ailələrin 20%-nin ailə büdcəsini planlaşdırdığını bildirir.

Azərbaycan Mədəniyyət və Turizm Nazirliyi 2013-cü ildə ölkəyə 2,4 milyon turistin gəldiyini bildirib.

“Novoe Vremya” keçmiş nazir Nicat Quliyevin 3 il azadlıqdan məhrum olunması xəbərini ilk səhifəyə çəkib.

Qəzet vəhabi təriqətindən olan Azərbaycan vətəndaşlarının Suriyadakı döyüşlərdə öldürlmələrinə “vəhabiliyin qurbanları” mövqeyini ifadə edir.

“Bizim yol”  Bakı Ağır Cinayətlər Məhkəməsinin hakimi Rauf Əliyevin sürücünü döyməsini, döyülən sürücünün həbs olunmasını önə çəkib.

“Yeni Müsavat”  PA-nın keçmiş şöbə müdiri Elnur Aslanovun Rabitə Nazirliyində şöbə müdiri təyin olunmasını “fəxri sürgünə göndərilməsi” kimi dəyərləndirərək ilk səhifəyə çıxarıb.

Qəzetin yazdığına görə, Xaçmazın Rusiya ilə sərhəd kəndlərinə “yezidi kürdlər” yerləşdirilir.

Qarabağ Azadlıq Təşkilatı Rusiyanın Krımı işğal etməsinə etiraz olaraq Rusiyanın Bakıdakı səfirliyi önündə etiraz aksiyası keçirib.