Mətbuat-Monitorinq 04.07.13

Rəsmi və iqtidaryönlü qəzetlər dövlət başçısı İlham Əliyevin Binəqədi rayonunda bir sıra obyektlərin açılışındakı iştirakını ilk səhifəyə çıxarıblar. Bundan əlavə, uzun müddət mətbuat səhifələrindən kənarlaşdırılan dövlət başçısının əmisi Cəlal Əliyev son günlər rəsmi mətbuatın “ulduzu”na çevrilir.

Rəsmi qəzetlər ölkənin etiraz elektoratının birliyi olan Milli Şuranın, aparıcı müxalifət partiyalarının əleyhinə çoxsaylı məqalələr dərc edib. Bu yazılarda Milli Şura vətənə dönüklük, müstəqilliyi başa düşməmək, başqa dövlətlərin əlində qul olmaq kimi ittihamlara məruz qoyulur. 

“Azərbaycan” qəzetinin redaktoru, deputat Bəxtiyar Sadıxov isə müəllif yazısı ilə müxalif qüvvələri vətəni satmaq kimi cinayətə məruz qoyur.     

“Azadlıq” qəzeti ölkənin iqtdar və demokratik qüvvələr düşərgəsindəki prosesləri önə çəkib. 

Milli Şuranın prezidentliyə vahid namizədi Rüstəm İbrahimbəyov namizədliyinə “qələbəmə əmin olmasaydım bu işə qol qoymazdım” bəyanatını səsləndirib. 

Deputat Mehriban Əliyevanın prezidentliyə namizədliyini irəli sürən DADP funksioneri Sevda Xurşudova PA-ya çağırılmalarına “hər şey qaydasındadır və işimiz davam edir, bizə təzyiq yoxdur” açqılamasını verib. 

Vəkil Əsabəli Mustafayev heç bir cinayəti olmayan siyasi fəal Daşqın Məlikovun həbsini “vicdana, haqq və ədalətə sığmayan həbs” kimi dəyərləndirib. 

Ekspertlər və hüquq müdafiəçiləri dövlət başçısı İlham Əliyevin heç bir halda polisi cəzalandırmayacağı barədə bəyanatını “təhlükəli və fəsad törədəcək hal” sayıblar. 

“Zerkalo” xarici səfərdə olan Milli Şuranın prezidentliyə vahid namizədi Rüstəm İbrahimbəyov Bakıya döndüyü halda həbs olunmayacağı haqda YAP funksioneri Mübariz Qurbanlının bəyanatını önə çəkib.  

“Ekspress” “Şahdəniz” konsoriumu ilə razılaşmaya əsasən Gürcüstanın Azərbaycandan alacağı qazın həcminin 3 dəfə artacağna “yenə də Tbilisi qazandı” şərhini verərək önə çəkib. 

İqtidaryönlü Ana Vətən Partiyasının sədri Fəzail Ağamalı Milli Şuranın prezidenliyə vahid namizədi Rüstəm İbrahimbəyovu “Kremlin layihəsi” təhqirinə məruz qoyub.

“Novoe Vremya” ABŞ-ın Azərbaycan səfiri Riçard Morninqstarın Azərbaycanda prezident seçkilərinin ədalətli olacağı bəyanatına “kor inam pis köməkçidir” şərhini verərək ilk səhifəyə çıxarıb.    

“Bizim yol” baş nazir Artur Rəsizadənin təqaüdə göndərilməyə hazırlandığını yazaraq bunu “iqtidarın seçki ərəfəsində kadr dəyişikliklərinə hazırlaşması” kimi qiymətləndirir. 

“Yeni Müsavat” ölkə iqtidarının ondan narazı olan istənilən vətəndaşa təzyiqə başlamasını önə çəkib. Müxalifətlə həmfikirliliyə görə həbsdə olan keçmiş səhiyyə naziri Əli İnsanova yeni cinayət işi açıla biləcəyi barədə xəbərdarlıq edilir.

Ölkənin müxalif siyasi şəxsləri dövlət başçısı İlham Əliyevin heç bir halda polisə cəza verməyəcəyi barədə bəyanatını “iqtidarın xalqa yox, zora söykənərək fəaliyyət göstərməsi” kimi dəyərləndiriblər.