Mətbuat-Monitorinq 04.12.15

Rəsmi qəzetlər Türkiyənin baş naziri Əhməd Davudoğlunun Azərbaycana səfərilə bağlı reportajları ilk səhifələrdə yerləşdiriblər.

Bundan əlavə, bu qəzetlərdə Nardaran hadisələrində əli olan şəxslərin ciddi cəzalandırılması mövqeyindən yazılar yer alır.

“Azadlıq” qəzeti “MTN işi” ilə bağlı 19 nəfərin həbs olunması, bu iş çərçivəsində 57 nəfərin zərərçəkən kimi tanınması, iş adamlarının milyon manatlarla ziyan görməsi kimi statistik rəqəmləri ilk səhifəyə çıxarıb.

İrana getmək istəyən Milli Şuranın Koordinasiya Mərkəzinin üzvü Eldəniz Quliyev Astarada saxlanılmasını “siyasi fəaliyyətinə görə təzyiqlərin tərkib hissəsi” kimi dəyərləndirib.

Həbsdə olan tanınmış hüquq müdafiəçisi Leyla Yunusun mədəsində ciddi problem yaranıb.

Qəzet “Nardaran olayları”na münasibətdə “Yeni Müsavat” qəzeti və onun redaktoru Rauf Arifoğlunun mövqeyini “mənəviyyat İŞİD-çi”si kimi qiymətləndirir.       

Nardaran ağsaqqalı Natiq Kərimov “Azərişıq”ın cəmi 5-6 ay əvvəl rəsmi olaraq kəndin 500 min manat elektrik borcunun olduğunu bildirdiyini xatırladıb. Indi bu borcun 42 milyon manata çatmasına təəccübünü ifadə edib.

Ekspertlərə görə, ölkə iqtisadiyyatı manatın sərbəst buraxılmasına hazır olmadığı üçün Mərkəzi Bank tam “üzən məzənnə” siyasətinə keçə bilməz. Növbəti devalvasiyanın dağıdıcı olacağını deyən ekspertlər ölkənin bank sisteminin tam çökmə ehtimalı olması barədə xəbərdarlıq ediblər.

Qəzet ekspertlərə isnadən son bir ildə Neft Fondunun gəlirlərinin 3,3 milyard dollar azaldığını bildirir.

Rəsmi Bakının hər ekstremal hadisədən sonra qanunvericiliyi sərtləşdirməsini ekspertlər “öldürərik, tutarıq, cərimə edərik” kimi rəsmi Bakının zor siyasətinə üstünlük verməsi kimi dəyərləndiriblər.

“Ekspress”  neftin ucuzlaşması, dolların bahalaşması fonunda manatın dəyərini saxlamağın çətinləşdiyini bildirərək “devalvasiya riski artır” xəbərdarlığını önə çəkir.

“Exo”  ekspertlərə isnadən ölkə vətəndaşlarının hər il həkim müayinəsinə getməsinə və tibbi preparatların alınmasına 4 milyard manata yaxın vəsait sərf etməsini “baha başa gələn sağlamlıq” kimi dəyərləndirir.

Bələdiyyələrin ölkə əhalisinə ancaq problemlər yaşatdığını iddia edən ekspertlər çıxış yollarından biri kimi bu sistemin ləğv olunmasını göstərirlər.

“Novoe Vremya”   Türkiyənin baş naziri Əhməd Davudoğlu ilə görüsdə dövlət başçısı İlham Əliyevin “bütün məsələlərdə Azərbaycanın Türkiyənin yanında olacağı” bəyanatını “Bakının yolunu müəyyənləşdirməsi” kimi diqqət mərkəzinə çəkir.

“Bizim yol”  Türkiyənin baş naziri Əhməd Davudoğlu ilə görüşdə dövlət başçısı İlham Əliyevin “Azərbaycan və Türkiyə bütün məsələlərdə bir-birini dəstəkləyir” bəyanatını “Bakıdan dünyaya açıq mesaj” kimi ilk səhifəyə yeləşdirib.

Qanunvericilikdə dərsdən yayınmaya görə valideynlərin cərimələnməsinin nəzərdə tutulmasına ekspertlər “dəhşətli nəticələrə səbəb ola biləcək addım” mövqeyini ifadə edirlər. 

Mərkəzi Bankın manatın kursunu saxlamaq üçün vəsaiti çatmadığını deyən ekspertlər manatın növbəti dəfə 30-35% dəyərdən düşməsinə “növbəti devalvasiyanın iqtisadiyyatı iflic edə bilməsi” xəbərdarlığı ediblər. 

“Yeni Müsavat”  “deputat” Naqif Həmzəyevin Azərbaycan istiqlalını 1918-ci ildə elan edən Məhəmməd Əmin Rəsulzadəni təhqir etməsinə görə bu gün parlamentdə müzakirə olacağını xatırladır.

Qəzet ailə qurmaq istəyən gənclərin 161 nəfərində siflis xəstəliyinin şakar olunmasını nəzərə çatdırır.

Ekspertlərə görə, ölkə daxilində və dünya valyuta bazarında baş verənlər Azərbaycanın “üzən valyuta siyasəti”nə keçidini qaçılmaz edir.

Ölkənin təhsil sisteminin bərbad gündə olduğunu deyən ekspertlər normal monitorinqə icazə verilsə bu sahədə dəhşətli rüsvayçılıqların üzə çıxacağını bəyan ediblər.