Mətbuat-Monitorinq 06.01.15

Rəsmi qəzetlər dövlət başçısı İlham Əliyevin “Boeing-787-8” təyyarəsinə baxış keçirməsi haqda xəbəri, ölkənin pravoslav dini icmasına təbrikinin mətnini ilk səhifələrdə yerləşdiriblər.  

“Azadlıq” qəzeti Makkeyn Institutunun rəhbəri Devid Kramerin ABŞ prezidenti Obamanı rəsmi Bakının ABŞ-dakı bank hesablarını dondurmaq və I Avropa Olimpiya Oyunlarını boykot etmək kimi sanksiyalara çağırmasını manjetə çıxarıb.

Makkeyn İnstitutunun rəhbəri Devid Kramerin rəsmi Bakıya münasibətdə “Quldur rejimi ABŞ-a meydan oxuyur” məqaləsini ekspertlər Azərbaycana sanksiyaların anonsu kimi dəyərləndirirlər.

Rəsmi Bakının beynəlxalq tənqidləri “müstəqil siyasət yürütməsi”lə inkar etməsi cavabına qəzet “bütün dünya ilə düşmən olmaq müstəqillikdirmi?” sualını ünvanlayır və bunu “hakimiyyətin “müstəqil siyasət şousu” adlandırır.

Qəzet həbsdə olan hüquq müdafiəçiləri İntiqam Əliyev və Rəsul Cəfərovun məhkəmə prosesinin yaxın günlərdə başlayacağını bildirir.

Media ekspertləri 2014-cü ildə rəsmi Bakının mediaya basqılarının pik həddə olduğu, KİV-lərin müstəqil halda maliyyələşmək imkanından məhrum edildikləri barədə bəyanat səsləndiriblər.  

Ekspertlər Neft Fondunun büdcəsinin indiyə kimi təsdiqlənməməsini neftin ucuzlaşmasının rəsmi Bakını çətin duruma salması kimi izah ediblər.

“Ekspress”  Müdafiə Nazirliyinin erməni tərəfə “cavabımız sarsıdıcı olacaq” bəyanatını ilk səhifəyə çəkib.

Qəzet həmçinin Xəzərin suyunun azalmasının Azərbaycan üçün ciddi fəsadlar yarada biləcəyinin mümkünlüyünü də diqqət mərkəzinə çəkib. 

“Novoe Vremya”  neftin qiymətinin ucuzlaşması fonunda rəsmi Bakının gəlir vergilərinin artırılmasına əl atmasına “neft olmasın, vergi olsun” münasibətini ifadə edir.

Qəzet Vaşinqtonda Azərbaycanla bağlı gözlənilən dinləmələrə “Vaşinqtondakı dinləmələrin arxasında nə durur” təəccübünü bildirir.

“Bizim yol”  bu il ölkədə siqaretin, spirtli içkilərin, avtomobilin bahalaşacağı anonsunu ilk plana çıxarıb.

“Yeni Müsavat”  bir zamanlar nəqliyyat naziri Ziya Məmmədovla biznes şəriki olan “Hafka” ləqəbli iş adamı Hafiz Məmmədova məxsus Fransanın “Lans” futbol klubunu nazirin oğlu Anar Məmmədovun almasını önə çəkərək bunu keçmiş şərikdən ağır zərbə kimi dəyərləndirir.

Ekspertlər ABŞ-ın Makkeyn İnstitutunun rəhbəri Devid Kramerin Azərbaycana qarşı sanksiya çağırışlarını ABŞ-a qarşı kampaniyaya adekvat reaksiya sayıblar.

Qəzet qeyd edir ki, bu günlərdə 14 saylı həbsxanada işgəncə ilə qətlə yetirilən Elşad Babayevin bacısını qəbul edən Penitensiar Xidmətin rəhbəri Mədət Quliyev bu işdə günahı olanların cəzalandırılacağını vəd edib.   

İqtisadi ekspertlər neftin ucuzlaşması amilini əsas gətirərək 2015-ci ili Azərbaycanda istehlakçılar və sahibkarlar üçün “ağır il” kimi dəyərləndiriblər.

Ölkədə kriminal duruma və yol qəzalarına toxunan qəzet bayram günlərində 280 cinayət tprədildiyini, 60 yol qəzasında 23 nəfərin həlak olduğunu, 84 nəfərin yaralandığını bildirir.