Mətbuat-Monitorinq 06.06.13

Rəsmi və hökumətyönlü qəzetlər dövlət başçısı İlham Əliyevin qəbulları haqda xəbərləri ilk səhifəyə çıxarıblar. 

“Azərbaycan” və “Yeni Azərbaycan” qəzetləri ölkənin etiraz elektortaını ətrafında biləşrdirməyi hədəf seçən Milli Şuranı milli maraqları satmaqda ittiham edir. Öz növbəsində Almaniya dövləti “neonasizm və ksenofobiya”nı dirçəltməkdə ittiham olunur.  

“Azadlıq” qəzeti keçmiş rektor Elşad Abdullayevin MTN generalları Hilal Əsədov və Akif Çovdarovun Xınalıq kəndində, Ramiz Mehdiyevin “Qurd qapısı”nda törətdikləri cinayətlər haqda yayacağı videolara dair anonsu ilk səhifəyə çıxarıb.

“Facebook” sosial şəbəkəsində siyasi müzakirələr aparan Azərbaycanın 4 qrupu eyni gündə heç bir izah olmadan bağlanıb. 

Hüquq müdafiəçiləri Azərbaycanda İnternetlə bağlı cəzaların sərtləşdirilməsini iqtidarın seçki təlaşının nəticəsi adlandırıblar.   

 Siyasi partiyaların təmsilçiləri rəsmi Bakının müxalif partiyalara tədbir üçün yer vermədiyi halda hakim YAP-ın qurultayını “Buta Palace”də keçirməsini  “iqtidarın daha bir ikiüzlülüyü” kimi dəyərləndiriblər. 

“Zerkalo” ABŞ Dövlət Katibi C.Kerrinin Ermənistan XİN başçısı E.Nalbandyanı qəbul etməsini Qarabağ münaqişəsinin nizamlanmasında Kerrinin vasitəçilik missiyasını yerinə yetirməyə başlaması kimi dəyərləndirir.  

“Ekspress” məişət zəminində zorakılıqların artmasını önə çəkərək ötən 5 ayda ailə münaqişələri zəminində 28 qadının qətlə yetirildiyini nəzərə çatdırır.  

Qəzet ekspertlərə istinadən ölkənin satış şəbəkəsində olan suların 40%-nin hər hansı standarta cavab vermədiyini yazır. 

“Novoe Vremya” . Aprelin 30-da İranda həbsə alınan və bu günlərdə sərbəst buraxıldığı deyilən Azərbaycan ədəbiyyatşünası Xalidə Xalid Bakıya ailəsinə zəng edərək bu günlərdə qayıdacağını bildirib.

“Bizim yol” ölkədə hər 100 min nəfərə 9 vəkil düşdüyünü, rayon məhkəmələrində hər 5-6 işdən yalınz birinə vəkil çıxa bilməsi kimi acınacaqlı durumu nəzərə çatdırır. 

Qəzet “Facebook” sosial şəbəkəsində Azərbaycan iqtidarına bağlı “Azərbaycan-2013: Qələbə” və “Prezidentə dəstək-2013” qruplarının səhifələrinin silindiyini, səbəblərinin məlum olmadığını yazır. 

“Yeni Müsavat” rəsmi Praqanın Azərbaycana münasibətdə “diktatura” sözünə görə rəsmi Bakının Çexiyanın neftini kəsməsi, bu ölkədəki səfirini geri çağırmaq hədəsi gəlməsini ön səhifədə yerləşdirib.

Ölkənin etiraz elektoratını ətrafında birləşdirməyi hədəf seçən Milli Şura təsis olunma tədbirini YAP-ın qurultayı ilə bir gündə, yəni iyunun 7-də keçirməyi nəzərdə tutur.

Qəzetin iddiasına görə, həbsdə olan keçmiş nazirlər Əli İnsanov və Fərhad Əliyev rəsmi Bakının önündə “ya azadlıq, ya Milli Şura” tələbini qoyub. 

Qəzet  nizamnamə kapitalını minimum 50 milyon manata qaldıra bilməyən və ilin sonuna kimi bağlanacağı nəzərdə tutulan 16 bankın siyahısını açıqlayıb.