Mətbuat-Monitorinq 08.10.15

Rəsmi qəzetlər neftin ucuzlaşması nəticəsində ölkəyə gələn gəlirlərin kəskin azalmasına baxmayaraq, Azərbaycan iqtisadiyyatının “davamlı inkişafı” haqqındakı məqalələri ilk səhifələrdə yerləşdirirlər.

“Azərbaycan” qəzeti Avropanı “yeni müstəmləkəçilik” siyasəti yürütmək itithamına məruz qoyan məqalə dərc edib.

“Azadlıq” qəzeti maliyyə naziri Şamir Şərifovun büdcə bölgüsündəki fərqlərə, Beynəlxalq Bankla bağlı kredit qalmaqalında konkret məsuliyyəti olanların adlarını çəkdiyinə göə “iri qruplaşmalarla üz-üzə qalmasını” ilk səhifəyə çıxarıb.

Qəzet yazır ki, Xaçmazda 6 uşaq anası olan Nərgiz Dibirova maddi sıxıntılar üzündən intihar edərək həyatına son qoyub.   

AXCP sədri Əli Kərimlinin müşaviri, xuliqanlıq iddiası ilə həbs edilən Məmməd İbrahimin apellyasiya şikayətinə bu gün baxılacaq.

Fəaliyyəti dayandırılan “Ayna-Zerkalo” qəzetlərinin redaktoru Elşin Şıxlı ölkədəki ictimai-siyasi durumu təhlil edərək rəsmi Bakını “özünü dünyadan təcrid etmək yolu” tutmaqda ittiham edib.

Ekspertlər rəsmi Bakının rayon avtomobillərinin Bakıya buraxılmaması qadağasını kənd təsərrüfatı məhsullarını bazardən məhrum etməsi sayırlar.

Hər il müştəri sayında artım olan AZAL-ın sənədlərdə hər ili “zərər”lə başa vurduğuna görə qəzet şirkəti müflisləşmə gözlədiyini nəzərə çatdırır.

Hökumətin qiymətlərini ucuzlaşdırdığı dərmanların apteklərdə tapılmamasını  qəzet “problemin inzibati yolla həllinin dərman qtılığı yaratmasına səbəb olması” kimi şərh edir. 

“Ekspress” MTRŞ sədri Nuşirəvan Məhərrəmlinin “ölkədə 10 yox, 6-7 kanal olsun bəyanatını “telekanalların ələnməsi” kimi diqqət mərkəzinə çəkib.

Qaz İxracı Ölkələri Forumunun rəhbəri Məhəmməd Adel Azərbaycan qazının ən tez halda 2022-25-ci illərdə Avropaya ixrac olunacağı haqda bəyanat səsləndirib.     

Bir müddət öncə Bakıda saxlanılan “nurçuluq” təriqətinə mənsub 5 nəfər şəxs Yasamal Rayon Məhkəməsinin zalında həbsə alınıb.

“Exo” ölkədə çörək istisna olmaqla qalan ərzaq məhsullarının 15% bahalaşacağını manjetə çıxarıb.

“Novoe Vremya”  evləri sürüşmə zonasında olan Zığ sakinlərinin yenidən etiraz aksiyası keçirdiklərini ön plana çəkir.

“Bizim yol”  Rusiyanın Xəzərdən Suriyaya raket zərbələri endirməsi haqda xəbərləri ilk səhifəyə yerləşdirib.

Qəzet Avropa Şurası təmsilçilərinin rəsmi Bakı və Azərbaycan hüquq müdafiəçiləri təmsilçilərilə birgə yaratdığı siyasi məhbus məsələsi üzrə işçi qrupun tərkibindən çıxdğını nəzərə çatdırır.

Ekspertlər ölkədən xaricə kapital axınının güclənməsini Azərbaycanda investisiya mühitinin pisləşməsi ilə əlaqələndirirlər.

“Yeni Müsavat”  MTRŞ-nin son zamanlar telekanallara olan hücumlarının arxasında bütün reklam pullarını hakimiyyətə yaxın kanallara yönləndirmək kimi bir siyasətin durduğu iddiasını önə çəkib.

ANS telekanalı ilə MTRŞ arasında münasibətlərin daha da gərginləşməsinə toxunan qəzet bunu telekanalın bağlanma təhlükəsinin olması kimi şərh edir.

Keçən ilin dekabrında 14 saylı həbsxanada döyülərək qətlə yetirilən Elşad Babayevin qətlinin yeganə şahidi Yadigar Nuriyev müəmmalı şəkildə dünyasını dəyişib.