Mətbuat-Monitorinq 11.02.14

Rəsmi qəzetlər dövlət başçısı İlham Əliyevin görüşləri, imzaladığı sərəncamlarla bağlı xəbərləri ilk səhifələrə çıxarıblar. 

“Azadlıq” qəzeti Azərbaycanda saxtalaşdırılmış prezident seçkilərinə müsbət rəyə görə Avropa Parlamentinin 7 üzvünə cərimə kəsməsini ilk plana çıxarıb.

Qəzet rəsmi Bakının QHT-lərin fəaliyyətilə bağlı qanunlara mürtəce dəyişikliklərin Vaşinqtonda narazılığa səbəb olduğunu yazır.

Viza müddəti qurtarmaqda olması bəhanəsilə Bakı aeroportunda tələb edilən rüşvəti vermədiyinə görə Miqrasiya Xidməti Almaniya vətəndaşı İntiqam Məcidovun pasportuna 1 il müddətinə deportasiya olunduğu barədə möhür vurub.    

Qəzet 2014-cü ildə ölkə ərazisində dəmiryol tariflərinin 31% artdığını, amma bunun haqda rəsmi açıqlama verilmədiyini qeyd edir.

“Zerkalo” Bakının “Sovetski” adlı məhəlləsinin sakinlərinin söküntülərlə bağlı təyin edilən kompensasiyaların həcmindən narazı qaldıqlarını və buna “aydın deyil, bu məbləği kim və necə müəyyən edib” reaksiyasını verdiklərini bildirir.

“Ekspress” Müdafiə Nazirliyinin hərbi xidmətə çağırılan çağırışçılardan 157 nəfəri geri qaytarmasına “xəstədən əsgər olmaz” şərhini verir.

“Yeni Müsavat”  ABŞ seysmoloqlarının Azərbaycanda zələzələ olacağı barədə proqnozlarını ölkə seysmoloqlarının inkar etməsinə baxmayaraq, dünən baş verən zəlzələni “zəlzələ proqnozu özünü doğruldur” kimi manjetə çıxarıb.

General Rail Rzayevin qətlindən 5 il ötməsinə baxmayaraq, qəzet hələ də qatilin və qətlin sifarişçilərinin tapılmadığını nəzərə çatdırır.