Mətbuat-Monitorinq 11.04.13

Rəsmi qəzetlər dövlət başçısı İlham Əliyevin qəbulları, Bakıdakı beynəlxalq İqtisadi Forum haqda yazırlar. Bundan əlavə,  bu qəzetlərdə tanınmış ziyalı Rüstəm  İbrahimbəyov “ermənilərlə iş bilriyində” ittiham edilir.   

“Azadlıq” qəzeti həbsdə olan keçmiş deputat Gülər Əhmədovanın “deputat mandatı alveri” ilə bağlı bütün məsuliyyəti öz üzərinə götürməsi şərtilə azad olunması haqda iqtidarla gizli anlaşması xəbərini manjetə çıxarıb. 

İranlı deputat Nadir Qazipurun “Azərbaycanda referendun keçirilsə xalq İranın tərkibinə daxil olmağa səs verər” bəyanatını qəzet “İrandan növbəti hədə” sayır.

Ziyalılar Forumu son vaxtlar ruhanilərin narkotik maddə  ittihamı ilə həbsə alınmalarını “iqtidarın islam dəyərlərinə hörmətsizliyi” adlandırıb.   

“Texnikabank”ın keçmiş rəhbəri Etibar Əliyev bankın bir sıra əməkdaşlarına qarşı məhkəmədə “bankda mütəşəkkil cinayət qrupu” olması ittihamına “bu cinayət işi sadəcə, söz yığnağıdır” cavabını verib.   

İqtidarın Azərbaycanda islam dövlətinin yaradıla bilməsi təhlükəsi ilə bağlı bəyanatına İslam Partiyası “belə dövlətin qurulması üçün ölkədə sosial bazanın olmadığını” bildirib.      

“Zerkalo” İranın müstəqil Azərbaycana ərazi iddalarını “iranlı deputatların suları bulandırması” adlandırır. 

“Ekspress” yazır ki, Mərkəzi Bank 2013-cü ilin I rübündə manatın məzənnəsinin qorunması üçün 560 milyon manat xərcləndiyini açıqlayıb.

“Exo” Bakıda mənzillərin yalnız 20%-ni Bakıda yaşayanların, qalanlarını isə əyalətlərdə, xaricdə yaşayan Azərbaycan vətəndaşlarının aldıqlarını yazır.

“Novoe Vremya” ölkədə sosial etirazların artan xətlə inkişafını iqtidarın yürütdüyü siyasətin qanunauyğun nəticəsi kimi şərh edir.

“Bizim yol”  ARDNŞ-nin “ATV İnternational”i alması xəbərini ilk səhifəyə çıxararaq bunu “ARDNŞ prezidentinə seçkilərə dəstək vermək tapşırığı” adlandırır.

“Azad Fikir” Universitetinin qapısı möhürlənib, Baş Prokurorluq əməkdaşlara heç bir məlumat vermədən ofisi bağlayıb.

YAP icra katibi Əli Əhmədovun hamını tanınımış ziyalı Rüstəm İbrahimbəyova nifrət etməyə çağırmasını “sensasion açıqlama” adlandırır. 

“Yeni Müsavat” hicab məhbuslarının siyasi mübarizə çağırışlarını “dindarların 2013-cü il seçkilərində aparıcı qüvvələrin birinə çevrilmək yolunda olması” kimi dəyərləndirir.

Qəzet orduda əsgər ölümlərinin rüşvət müqabilində ört-basdır olunduğunu iddia edir. 

İran parlamentində Azərbaycanın bu dövlətin tərkibinə daxil edilməsi haqda qanun layihəsinin hazırlanmasını ekspertlər “İranın Azərbaycanı rəsmən hədələməsi” adlandırıblar.