Mətbuat-Monitorinq 12.12.13

Rəsmi qəzetlər mərhum dövlət başçısı Heydər Əliyevin vəfatının 10-cu ildönümü, dövlət başçısı İlham Əliyevin Milli Atlas redaksiya heyətinin yeni tərkibi, müdafiə sənayesi işçilərinin təltif olunmaları, fəxri adların verilməsi barədə imzaladığı sərəncamlar haqda yazırlar.  

“Azadlıq” qəzeti fövqəladə hallar naziri Kəmaləddin Heydərovun “vurulacağı” qənaətini ilk səhifəyə çıxarıb.

Azərbaycan neftinin satılması ilə bağlı məxfi sazişlər imzalayan, ARDNŞ prezidenti Rövnəq Abdullayevin dayısıoğlu olduğu deyilən, adı 48 törəmə şirkətin rəhbərliyində keçən Anar Əliyevin daha bir ofşor şirkəti Moskvada üzə çıxıb. Hüquq müdafiəçiləri məxfi neft sazişləri və A.Əliyevlə bağlı araşdırma aparılmasını tələb edirlər. Bir sıra deputatlar məxfi neft sazişlərilə bağlı ARDNŞ-i ya açıqlama verməyə, ya da təkzib verməyə çağırıblar.

Qəzet yazır ki, Sumqayıt şəhərində atışma olub, atışmanın səbəbi məlum deyil, şahidlərin qənaətinə görə, atışma polislə vəhabilər arasında baş verib.

Qəzet məlumatlı mənbələrə istinadən bildirir ki, işdən azad edilən generallardan biri həbsə alınıb, keçmiş nazir Səfər Əbiyevlə əlaqələri araşdırılır.

“Ekspress”  yazır ki, “Şərq tərəfdaşlığı” ölkələrinin Kremlin təsir dairəsində olması və imperiyanı bərpa etmək üçün istfadə etmək istəməsi haqda iddialara tanınmış politoloq Zbiqnev Bzejinski “Moskva zəif və kasıbdır, elə durumda deyil ki, güc yolu imperiyasnı bərpa edə bilsin” şərhini verib.

“Exo” 2013-cü ilin 11 ayı ərzindəki yol qəzalarında 1061 nəfərin həlak olduğunu, 2646 nəfərin isə xəsarət alması ilə bağlı statistikanı nəzərə şatdırır. 

“Novoe Vremya”  beynəlxalq qurumların Azərbaycanda demokratik və müsair peşə tələblərinin mənimsənilməsilə bağlı keçirdikləri treninqləri mənasız sayaraq “treninqlərlə problemi həll etmək mümkün deyil” mövqeyini ifadə edib. 

“Bizim yol” Sumqayıtda Suriyaya gedən və bundan imtina edən vəhabi qrupları arasında baş verən atışmada ölən və yaralananların olması haqda xəbəri manjetə çıxarıb.

Qəzet Bakıətrafı kənd və qəsəbələrin inkişafına 300 milyon manatın xərcləndiyinə amma nəticənin olmadığına görə “300 milyon manat hara xərclənib?” sualını verir.

Ölkənin mənzil bazarında durumu təhlil edən qəzet mənzillərin, tikinti materiallarının  qiymətində artımı əhalinin yaxın 3-4 ayda hiss edəcəyini yazaraq “gələn idən daşınmaz əmlakın qiymətləri od tutub yanacaq” mövqeyini ifadə edir.

“Yeni Müsavat” ölkə neftilə bağlı məxfi sazişlər bağlayan Anar Əliyev kimi “sirr adam”in Moskvada hüquq firmasının üzə çıxmasını ön səhifəyə çəkib.

Müsavat Partiyasının funksioneri Arif Hacılı “Müsavat”a qarşı əsassız ittihamları müxalifət düşərgəsində qarışıqlığı artırmağa xidmət” kimi dəyərləndirib.

Qəzetin yazdığına görə, narkotik maddə ilə tutulan Astara sakini Zamin Mirzəyev Yasamal Rayon Polis İdarəsinin binasının 4-cü mərtbəsindən özünü ataraq intihar edib.