Avropa İttifaqının öz tərəfdaşları ilə münasibətlərində insan hüquqları prioritet olmalıdır

Avropa Parlamentinin üzvləri Avropa İttifaqına müraciət edərək öz tərəfdaşları ilə münasibətlərində insan hüquqları və demokratiya məsələlərini prioritet elan etməyə çağırıb.

Hətta iqtisadi böhran zamanı insan hüquqları və qanunun aliliyi arxa plana keçə bilməz. Avropa Parlamentinin məruzəçisi Eduard Kukan belə hesab edir.

“İnsan hüquqları sahəsində Avropa İttifaqının daha aydın və effektiv siyasəti olmalıdır”, - o vurğulayıb.

Avropa İttifaqına tərəfdaş ölkələrdə insan hüquqlarının pisləşməsi Avropa Parlamentində xüsusi narahatlıq doğurur. Bununla əlaqədar Avropa Parlamentində vətəndaş cəmiyyətinə repressiyalar həyata keçirən bütün hakim rejimlərə qarşı sanksiya qəbul edilməsi ilə bağlı çağırışlar səslənib.

Avropa Parlamentinin üzvləri Aİ-yə tərəfdaş ölkələrdə hüquq müdafiəçilərinə və araşdırmaçı jurnalistlərə daha əməli yardımın göstərilməsinə çağırıblar. Bu barədə Aİ-nin İnformasiya Mərkəzi məlumat yayıb. -02D-