Mətbuat-Monitorinq 13.08.13

Rəsmi və iqtidaryönlü qəzetlər İtaliya Nazilər Şurası prezidentinin Azərbaycana səfərini, görüşlərini ilk səhifəyə çıxarıblar. Bundan əlavə, bu qəzetlərdə seçkilərlə bağlı Mərkəzi Seçki Komissiyasının təlimatları əksini tapıb.

Bunlarla yanaşı bu qəzetlərdə ölkənin protest elektoratının birliyi olan Milli Şuranın, onun prezidentliyə vahid namizədi Rüstəm İbrahimbəyovun şəxsiyyətinin təhqirə məruz qoyulması kimi yazılara geniş yer verilib.

“Azadlıq” qəzeti ölkənin protest elektoratı olan Milli Şuranın Rüstəm İbrahimbəyovun prezidentliyə namizədliyinin sona qədər müdafiə olunması və kütləvi aksiyalara başlamaq qərarını manjetə çıxarıb. 

Jurnalist Eynulla Fətullayevin Milli Şuranın üzvü Eldar Namazovu “dövlət çevrilişinə səydə”  ittiham etməsinə  sonuncu “bunlar cəfəngiyyatdır” cavabını verib.  

İranda xəstəxana xərclərinin 5500 dollarlıq hissəsini ödəyə bilməyən Azərbaycan vətəndaşlarının 5 aylıq övladı 10 gündür ki, girov kimi İran həkimlərinin əlində saxlanılır. 

Naməlum şəxslərin avqustun 8-də AXCP sədri Əli Kərimlinin evinə girməsini təhlil edən ekspertlər AXCP liderinin həyatına sui-qəsd planının hazırlana biləcəyini istisna etmirlər. 

RF prezidenti Putinin Azərbaycana səfərinə siyasi ekspertlər “pressinq, Putinin hansısa şərtlərinə Azərbaycan tərəfin razılıq vədinin nəticəsi” şərhini veriblər.

“Zerkalo” 15 günlük inzibati cəza alaraq Binəqədi təcridxanasında saxlanılan Müsavat Partiyası gənclər təşkilatının sədri Tural Abbaslının anasının oğlunun kürəyində döyülmə izləri görməsi haqda açıqlamasını önə çəkib.

“Ekspress”. Məhkəmə-Hüquq Şurasının qərarı ilə 3 məhkəmə sədri vəzifəsindən azad olunub, 5 hakimin fəaliyyətinə vaxtındfan əvvəl xitam verilib. 

Məktəb hazırlıqları ilə bağlı Bakı bazarlarını saxta məktəbli formalarının satışına başladığını yazan qəzet Bakı Tikiş Evinə istinadən Çindən gətirilən bu məktəbli formalarının 10 gün geyindikdən sonra tiftikləndiyini bildirir. 

“Novoe Vremya”  Avropa İttifaqının Azərbaycanda missiyasını başa vuran təmsilçisi Roland Kobianın “daha iki il vaxtım olsaydı diqqəti əsas azadlıq və demokratikləşmənin üzərinə cəmlərdim” açıqlamasını “vida açıqlamaları və ya Roland Kobiadan köhnə nağıllar” kimi dəyərləndirir. 

“Bizim yol” Milli Şuranın sessiyasında prezidentliyə ehtiyat namizəd təklifinin keçməməsini “sessiyanın nəticəsiz bitməsi” kimi dəyərləndirir.

Qəzet RF prezidenti ilə birgə Rusiya nazilərinin çoxunun Bakıya səfərə gəlməsini “Rusiya hökumətinin Bakıya gəlməsi” kimi dəyərləndirir. 

Ali məktəblərə builki qəbul imtahanlarında 40 min nəfərə yaxın abituriyent 0-100 bal toplayıb, bu isə hər 3 məzundan birinin bilik səviyyəsi deməkdir. 

“Yeni Müsavat” Milli Şuranın sessiyasında prezident seçkilərində Rüstəm İbrahimbəyovla sona qədər davam edilməsi, yeni vahid namizəd təkliflərinin keçməməsi, avqustun 18-nə aksiya təyin olunması xəbərini ilk səhifəyə çıxarıb. 

Qəzet jurnalist Eynulla Fətullayevin İlham Əliyevi devirmək üçün müxalifət düşərgəsinə 20 milyon dolların verilməsi barədə yazısına “müxalifət düşərgəsini təpədən- dırnağa qədər silkələyəcək hadisə və həbslərin anonsu” şərhini verib.