Mətbuat-Monitorinq 14-15.04.13

Rəsmi qəzetlər bəzi qanunlara dəyişikliklər, bəzi qanunların tətbiqi, bəzi sazişlərin təsdiqi haqda rəsmi sənədlərin mətnlərini dərc ediblər. Bundan əlavə, bu qəzetlərdə “Uşaqların məcburi dispanserizasiyası haqqında” qanunun mətni dərc olunub.   

“Azadlıq” qəzeti Böyük Britaniya mediasının Əliyevi “qəddar diktator” adlandırmasını, deputat və hüquq müdafiəçilərinin isə şahzadə Endryünün Əliyevlə görüşünə görə hökumətdən izahat tələb etmələrini manjetə çıxarıb.

Tərtərdə hərbi hissənin qazanxanasının kustar üsulla istifadəsi nəticəsində baş verən partlayışda iki əsgər xəsarət alıb. 

Cəmiyyətin fəallaşmasının “günahını” sosial şəbəkələrdə axtaran iqtidarın bu sosial şəbəkəyə hücumlarını qəzet “facebook yasağı” adlandırır. 

Zərdab rayonunun icra başçısı Lütfəli Babayev sahibkar Fəqan Nəsibovun 65 min manat pulunu mənimsədiyi üçün sahibkar ailəsi ilə birgə Bakıya yürüşə hazırlaşır. 

Ölkədə prokurorluq sisteminin fəaliyyətinə hüquqşünas Müzəffər Baxış “Zakir Qaralov baş prokuror olandan sonra bu orqan məhv edilib” şərhini verib. 

Politoloq Eldar Namazov hökumətyönlü mətbuatın onu hansısa başqa dövlətin agenti olmaqda ittihamlarına ironiya ilə “əvvəl ABŞ agenti dedilər, indi Rusiya agenti deyirlər, sabah da yəqin Çini, Mozambiki deyərlər” cavabını verib.

Dini hüquqlarını tələb etdikləri üçün rəsmi Bakının dindarları “xarici qüvvələrə” işləmək” ittihamlarına dindarlar “hüquqlarımızı tələb etməyin, insan kimi yaşamaq isyəimizin xarici qüvvəyə nə dəxli var” cavabını veriblər.   

İlahiyyatçı Taleh Bağırzadənin həbsində adının hallanmasına etiraz edən deputat Zeynəb Xanlarovanı bu addımına görə hökumət KİV-ləri “hədəf”ə alıb. 

“Yeni Müsavat” dövlət başçısı İlham Əliyevin sədrliyi ilə birinci rübün nəticələrilə bağlı Nazirlər Kabinetinin bazar günü keçirdiyi toplantını “qəfil bazar günü toplantısı” adı ilə manjetə çıxarıb.

“NİDA” gənclər hərəkatı üzvlərinin həbslərinə cavab olaraq son zamanlar bu quruma daxil olanların sayının artdığı bildirilir.   

Hökumətyönlü deputat və partiya sədri Qüdrət Həsənquliyev iqtidara “ölkəni daha 90-cı illərin metodları ilə idarə etmək mümkün deyil...” bəyanatını səsləndirib. 

İsmayıllı sakinləri 26 yanvar hadisələrilə bağlı həbs edilənlər mayın 10-a kimi azad edilmədikləri haqda aksiyalara başlayacaqlar. 

Oğuz rayonunun keçmiş icra başçısı Vaqif Davudov rəsmi Kremlə bağlı olan Arif və Vaqif Kərimov qardaşlarının etnik zəmində qarşıdurma yaratmaq istədiklərini açıqlayıb. 

“Bakı Xəbər” Azərbaycan KQB-nin keçmiş şefi Vaqif Hüseynovun şərti “milraderlər ittifaqı”na üzv olmasını rəsmi Kremlin qurumun işinə ciddi siyasi yön verməsi kimi dəyərləndirir.