Mətbuat-Monitorinq 14.09.12

Rəsmi qəzetlər dövlət başçısı İlham Əliyevin görüşləri, ölkənin “dinamik iqtisadi inkişafı” haqda yazır. Bir də bu qəzetlərdə müxalifətin “dağılmaqda, çürüməkdə, parçalanmaqda olması”kimi iddialı məqalələr yer alır.

“Azadlıq” qəzeti yaranan ağır maliyyə böhranından çıxa bilmək üçün oxucularına “hərəyə iki qəzet alın” müraciəti edib.

AXCP Gənclər Komitəsi gənclərin ev problemini və indiki ipoteka şərtlərinin problemi həll etməyə qadir olmadığını ictimai diqqətə gətirmək üçün “Hər gəncin evi olsun!” şüarıilə kampaniyaya başlayıb. 

“London taksi”lərində plan artırılıb. Sürücülər işdən çıxmaq istəsələr də onlara əmək kitabçaları verilmir. 

Məhəmməd Peyğəmbərin təhqirə məruz qoyulduğu, ərəb dilinə tərcüməsi titrlə verilən “İslamın məsumiyyəti” adlı film islam aləmində ABŞ diplomatlarına hücumlara səbəb olub və hücumlar hələ də səngiməyib. 

“Zerkalo”. Bir zamanlar sosial şəbəkələrdə rekordlar qıran “Davay, do svidaniya” süjetinin müəllifi, indi həbsdə olan “Talişi sədo” qəzetinin redaktoru Hilal Məmmədova ömürlük həbs cəzası hazırlanır. Qəzet bunu istintaqın gedişi barədə ictimaiyyətə heç nəyin məlum olmaması ilə əlaqələndirir. 

“Ekspress”. Güney Azərbaycanın Qaradağ mahalında su üstündə bu mahal sakinləri ilə İran polisi arasında toqquşma olub. Yaralanan və həbs edilənlər var.      

  Londonun simvollarından olan “Biq Ben” bundan sonra rəsmi olaraq “II Yelizaveta qülləsi” adlanacaq.  

“Exo”. Bakı ətrafı və Azərbaycanın bəzi regionlarının sakinləri bi ilin yay mövsümündə 160 ilan və 88 zəhərli hörümçək sancması hadisəsindən əziyyət çəkib. 

“Novoe Vremya” ölkədə siyasi və iqtisadi islahatların zərurət olduğunu yazaraq, bu məqama “geriyə yol yoxdur” mövqeyini ifadə edir. 

“Bizim yol”. Avropa Parlamentinin Azərbaycan zabiti Ramil Səfərovla bağlı qəbul etdiyi qətnamədə onun azad olunması “diplomatik zəmanətin pozulması” kimi dəyərləndirilib. 

Vətəndaşları mənzil tikintisi adı ilə aldatdığına görə həbs edilən “AQ İnşaatçı Servis”in başçısı Şakir Əliyevə 3 milyon manat ödətdirilib və bu, ilk belə hadisədir ki, şirkət vətəndaşlardan mənimsədiyi pulu qaytarır.  

“Yeni Müsavat” rəsmi Vaşinqtonla Bakı arasında 2013-cü il prezident seçkilərinə münasibətdə siyasi sövdələşmə başladığını, Vaşinqtonun İlham Əliyevin prezidentliyə namizədliyinə etiraz etməycəyini, “Amerikanın səsi” və “Azadlıq” radiolarının milli tezliklərə qaytarılacağını iddia edir. 

Yol-nəqliyyat qəzasında həyatını itirən Müsavat Partiyasının üzvü Aydın Acalovun oğlu Rəşad Acalov bu qəzaya görə həbsə alınan gənc müsavatçı siyasi fəal Nigar Yaqubludan şikayətçi olmadıqları haqda ərizəni Bakı Şəhər Yol Polis İdarəsinə təqdim edib. 

“Bakı Xəbər” islam peyğəmbərini təhqir edən filmin nümayiş etdirilməsilə bağlı ərəb dünyasında ABŞ diplomatlarına olan hücumları “dünyanın müsəlman-xristian qarşıdurması əfərəsində olması” kimi qiymətləndirir.