Ukrayna yenə Türkiyədən TANAP-da pay istəyir

 Türkiyə Ukrayna ilə energetika sahəsində birgə layihələrdə, xüsusən karbohidrogen hasilatında maraqlıdır, deyə Rəcəb Tayyib Ərdoğan Ukrayna prezidenti Viktor Yanukoviçlə görüşündə bildirib. 

"Biz elektrik enerjisinin nəqli, Türkiyə ərazisində yeraltı qaz anbarı tikintisi, karbohidrogen hasilatında əməkdaşlıq edə bilərik", - deyə Ərdoğan bildirib. 

Öz növbəsində Yanukoviç deyib ki, Türkiyə baş naziri ilə görüşdə energetika məsələsi müzakirə edilib. Bu istiqamətdə aktiv dialoq aparılır. 

O həmçinin bildirib ki, Ukrayna Transanadolu qaz kəmərinin tikintisi layihəsinə qoşulmaq istərdi. 

Başlanğıcını Türkiyənin şərqindən götürüb Türkiyənin Bolqarıstan və ya Yunanıstanla sərhədinə kimi uzanacaq TANAP “Cənub qaz dəhlizinin” bir hissəsi olacaq. Onunla “Şahdəniz” qazının Avropaya çatdırılması nəzərdə tutulur. Minimal buraxılış qabiliyyəti 16 mlrd m3 olacaq. Layihə iştirkaçıları layihə ilə bağlı bütün məsələləri bu il bitirib gələn il tikintiyə başlamaq istəyirlər ki, qaz kəməri 2017-ci ilin sonuna hazır olsun. 

Bu ilin martında rəsmi Kiyev Türkiyədən xahiş etmişdi ki, ona TANAP-da pay verilsin. Belə bir müraciəti Ukrayna baş naziri ARDNŞ rəhbərliyinə də etmişdi. Bu məsələni mətbuata şərh edən Rövnəq Abdullayev demişdi ki, TANAP-da üçüncü tərəfə pay ARDNŞ-nin payından və Xəzərdə qaz resursu olan şirkətlərə verilə bilər. --12В--