Mətbuat-Monitorinq 14.09.15

Rəsmi qəzetlər dövlət başçısı İlham Əliyevin 5 saylı Bakı Peşə və 264 saylı Xətai rayonu məktəb-liseyində aparılan yenidənqurmadan sonrakı vəziyyətlə tanış olması haqda xəbərləri ilk səhifələrdə yerləşdiriblər.

Avroparlamenitn Azərbaycanla bağlı tənqidi qətnaməsinə cavab olaraq “Azərbaycan” qəzeti 5 məqalə dərc edib. Bu məqalələrdə qətnamənin “qərəzli sənəd” olmasını, qurumun “antiazərbaycançı şəbəkənin əlində oyuncağa dönməsi”ni “sübut” etmək” istəyirlər.

Eləcə də “Xalq qəzeti”nin və “Respublika” qəzetlərinin səhifələrində bu mövzuda 4-5 məqalə dərc edilib.

“Azadlıq” qəzeti Avroparlamentin Azərbaycana aid qətnaməsinə cavab olaraq rəsmi Bakının Avropa ilə əlaqələri kəsmək səylərini bu qitədə biznesi, əmlak və pulu olan məmurların dəstəkləmədiklərini manjetə çıxarıb.

Milli Şuranın sədri Cəmil Həsənli Avroparlamentin Azərbaycana aid qətnaməsinə etiraz olaraq rəsmi Bakının Avropa İttifaqının Bakı ofisi önündə təşkil etdiyi aksiyanı “saxta vətənpərvərlik üfunəti” adlandırır.

Rəsmi Bakıya üsyan edərək Avropada qalan diplomat Arif Məmmədov Avroparlamentin qətnaməsinə “Avroparlament Azərbaycan xalqının maraqlarını müdafiə edib” şərhini verib.

Avropanı boykota çağıran rəsmi Bakı təmsilçilərinə ekspertlər “Avropa pisdirsə o zaman gen-bol istifadə etdiyiniz Avropa məhsullarını boykot edin” bəyanatını səsləndiriblər.

Azərbaycanın Niderlanddakı konsulu Nahid Cəfərov vəzifəsindən azad edilərək Bakıya çağırılıb, diplomat isə Niderlanddan sığınacaq istəyib.

Araşdırmaçı jurnalist Xədicə İsmayıl “The Washington Post” qəzeti vasitəsilə həbsxanadan Qərb siyasətçilərinə “insan haqları və demokratiyanı enerji və təhlükəsilzik əməkdaşlığına qurban verənlər bilməldirilər ki, korrupsiya və mütəşəkkil cinayətkarlığın sərhədləri yoxdur” mesajını ünvanlayıb.

Keçmiş deputat və YAP-çı Eldar Sabiroğlu PA-nın rəhbəri Ramiz Mehdiyevin fəlsəfə elmindən xəbərsiz olmasına sübut kimi “əgər fəlsəfənin kateqoriyalarını tam olaraq deyə bilsə adımı dəyişərəm” iddiasını ortaya qoyub.

“Yeni Müsavat”  son vaxtlar Azərbaycanın bir neçə diplomatının  Avropadan sığınacaq istəyərək Avropada qalmasını “Qərbin Bakını diplomatlarla vurması” adlandıraraq ilk səhifəyə çıxarıb.

Müxalifətdə olan bəzi partiya liderləri ATƏT-in Azərbaycanda parlament seçkilərini müşahidədən imtina etməsini ölkənin beynəlxalq qurumlar qarşısında götürdüyü öhdəlikləri yerinə yetirməməsinin birbaşa təsdiqi adlandırırlar.

Ekspertlər Qarabağ problemilə bağlı duruma “yeni situasiyanın yaranması və müharibənin qəfil başlaması üçün əngəl qalmaması” şərhini veriblər.

Qəzet ekspertlərə isnadən xarici bazardan xammal və məhsul asılılığını qeyd edir, gözlənilən növbəti devalvasiyanın tezliklə ölkədə qiymət artımına səbəb olacağı  barədə xəbərdarlıq edir.