Mətbuat-Monitorinq 15.03.14

Rəsmi qəzetlər dövlət başçısı İlham Əliyevin İtaliyanın Fruili-Venesiya-Culiya regionunun regional prezidentinin başçılıq etdiyi nümayəndə heyətini qəbul etməsi,  AMEA-nın 70 illik yubuleyilə bağlı sərəncam imzalaması, bir sıra bəyannamə, saziş və protokolların təsdiq olunmaları haqda xəbərləri ilk səhifəyə çıxarıblar.
   

“Azadlıq” qəzeti qanunlara əsasən dövlət məmurlarının bizneslə məşğul olmağa haqları çatmadığı halda fövqəladə hallar nazirinə bağlı şirkətlərin bir hissəsinin siyahısını dərc edib.

Ölkənin bir qrup hüquq müdafiəçisi AXCP-yə təzyiqləri, eləcə də ölkədəki ağır ictimai-siyasi durumu pisləyən bəyanat yayıb.

YAP-çı deputat Siyavuş Novruzovun icra başçılarını dövlət vəsaitlərini talamaqda ittiham etməsini müxalif siyasətçilər “hakimiyyəti ifşa etməsi” kimi şərh ediblər.

Metropolitenin yeni rəhbərliyinin idarədə yoxlamalara başlamasını qəzet  keçmiş rəis Tağı Əhmədovun həbs olunacağı ehtimalı kimi dəyərləndirir.

Milli Şuranın bu yaxınlarda AXCP-nin ofisində baş vermiş partlayışa həsr edilən dinləmələrində tədqiqat qrupu bu partlyışın təsadüfi olmadığı qənaətini ifadə edib.

“Ali və Nino” kitab mağazaları şəbəkəsinin rəhbəri Nigar Köçərli Vergilər Nazirliyinin istintaq idarəsinə çğaırılıb.
     

“Ekspress” metro keçidlərində 1194 ticarət köşkünün söküləcəyini nəzərə çatdırır.

Krım tatarları Yardımlaşma Dərnəyinin rəhbəri Tuncer Kalkay türk xalqları və dövlətlərini Krım tatarlarına dəstək olmağa çağırıb.
     

“Novoe Vremya”  baş nazir Artur Rəsizadənin parlamentə hesabatında ölkədə dinamik inkişafdan danışmasını əsassız sayaraq buna ironiya ilə “baş nazirin gözünə yenə “dinamik inkişaf” göründü” mövqeyini sərgiləyir.
   

“Bizim yol”  hökumətin parlamentə hesabatına tənqidi münasibət ifadə  edən deputat İlyas İsmayılovla spiker Oktay Əsədovun  arasında gərginlik yaranmasını önə çəkib.

Rusiyanın Ukraynaya müdaxiləsilə bağlı şərh verən ekspertlər belə bir prosesin Azərbaycanı da gözlədiyi barədə xəbərdarlıq ediblər.    

Son vaxtlar paytaxtda ticarət mərkəzlərinin yanmasına toxunan qəzet ölkədə 10-a qədər ticarət mərkəzində baş verən yanğınların artıq şübhəli məqamlara yol açdığını bildirir.
 

“Yeni Müsavat”  metropoliteninin keçmiş rəisi Tağı Əhmədovun fəaliyyətini vergi və prokurorluq orqanlarının yoxlamağa başlaması, onun həbs oluna biləcəyi xəbərini ilk  səhifəyə çıxarıb.

Metro keçidlərində ticarətin ləğv olunacağı ilə bağlı sahibkarlar Bakı meriyasının ticarət üçün onlara təklif etdikləri yerlərdə müştəri azlığını əsas gətrirərək imtina ediblər.

“Moskva” Univermağının yanmasına toxunan qəzet sahibkarlara 10 min manatlarla ziyan dəydiyini iddia edir.

“İsmayıllı olayları”na görə həbs alınan köşə yazarı Tofiq Yaqublu həbsinə səbəb kimi 2009-cü ildə ADNA-da baş vermiş terror hadisələrinin istintaqında baş prokuror Zakir Qaralovun yalanlarının üstün açmasını göstərib.