Mətbuat-Monitorinq 17.05.13

Rəsmi və hökumətyönlü qəzetlər dövlət başçısı İlham Əliyevin Şamaxı rayonuna səfərini, səfər çərçivəsində bəzi obyektlərin açılışında iştirakını ilk səhifələrə çıxarıblar. 

“Azadlıq” qəzeti Bakının yeni rayonuna çevrilən Pirallahı qəsəbəsinin mərkəzi hissəsində inzibati binaların tikilməsi məqsədilə evlərin sökülməsinə etiraz olaraq sakinlərin aksiya keçirmələrini  əhalinin “Əliyevlərin “yeni rayon” layihəsini etirazla qarşılaması” kimi şərh edərək ilk səhifəyə çıxarıb.

Qəzetin bu il 20-23 mart saylarındakı “Ordu, yoxsa can bazarı” yazısına görə Müdafiə Nazirliyi qəzeti məhkəməyə verib, 100 min manat təzminat tələb edir, bu gün növbəti məhkəmə prosesidir. 

İsmayıllı rayon icra başçısı 26 yanvar hadisələri ilə bağlı həbs edilənlərin azad olunacaqlarını vəd etsə də 14 nəfərin həbs müddəti daha 3 ay uzadılıb. 

Kütləvi aksiyada iştiraka görə inzbati cəza alan və müvəqqəti təcridxanada saçları zorla qırxdırılan Əbülfəz Qurbanlı, İlkin Rüstəmzadə və Turqut Qəmbər Daxili İşlər Nazirliyini məhkəməyə veriblər. 

Amnesty İnternational rəsmi Bakının İnternet resurslarda təhqirə görə cəzaları sərtləşdirməsini “İlham Əliyevin tənqidi səsləri boğması” adlandırır. 

Ölkə politoloqları şeyxülislam Allahşükür Paşazadənin İrana gözlənilən səfərinə “bu səfərin münasibətlərin yaxşılaşmasına təsiri olmayacağı” proqnozunu veriblər. 

“Zerkalo” Naxçıvanda 9 hərbçi ailəsinin zorla evlərindən çıxarılmalarına “Vətəni müdafiə etmisən get bataqlığa!” mövqeyini  ifadə edir. 

2010-cu ilin Kür daşqınlarından 3 il keçməsinə baxmayaraq, zərərçəkənlərin  məhkəmələrdə dövlət qurumları ilə çəkişmələrini qəzet “daşqın işlərinin hələ də uzanması” kimi dəyərləndirir.

“Ekspress” yeni təhsil nazirinin bu sahənin orta rəhbər eşelonunda bəzi şəxsləri cəzalandırmasını “yeni nazirdən “cəza yağışı”” adlandırır.

Qəzet ölkədə kişilərin 16, qadınların 32 faizinin köklükdən əziyyət çəkdiyini bildirir. 

“Exo” Bakı Şəhər İcra Hakimiyyətinə istinadən Bakının bütün çimərliklərinə girişin pulsuz olacağını bildirir. 

“Novoe Vremya” rəsmi Bakının Finlandiyada ATƏT-in fəaliyyətini kəskin tənqidə məruz qoymasına “hücum ən yaxşı müdafiədir” ironiyası ifadə edərək  “iqtidarın ATƏT-i  bu yolla “qorxutmağı düşündüyünü” nəzərə çatdırır.

Qəzet orduda daha bir əsgərin həyatını itirməsinə “qeyri-döyüş itkilərinin sonunun görünməməsi” şərhi verir.

“Bizim yol” “Xural” qəzetinin redaktoru Əvəz Zeynallının 10 saylı həbsxanaya köçürüldüyünü, bu köçürlümədən vəkilinin belə xəbəri olmadığını bildirir. 

“Yeni Müsavat” sosial şəbəkədə yazılarına görə dini bloqer Rəşid Ağəddini 12 il həbs cəzasının gözləməsini qəzet “ölkədə facebook həbslərinin başlanması” adlandırır. 

Qətərdən qayıdan Bakının Nizami Rayon İcra Hakimiyyətinin keçmiş başçısı Mehbalı Əliyev gömrükdən nəyisə gizli saxladığına görə Bakı aeroportunda bir neçə saatlıq saxlanılıb.