Mətbuat-Monitorinq 17.10.14

Rəsmi qəzetlər dövlət başçısı İlham Əliyevin Tacikistan səfəri, keçirdiyi görüşlər barədə xəbərləri ilk səhifələrdə yerləşdiriblər.

“Azadlıq” qəzeti ABŞ-ın Əliyev rejimindən siyasi məhbusları azad etməsini və rəsmi Bakının buna sərt mənfi reaksiya verməsini manjetə çıxarıb.

Son vaxtlar siyasi məhbusların dövlət başçısı İlham Əliyevin adına artan ərizələri ilə bağlı vəkil Xalid Bağirov “hər bir siyasi məhbusa təklif, təkid və basqının nəticəsi” kimi açıqlama verib.   

Müdafiə Nazirliyində tenderlərin monopoliya altında olduğunu yazan qəzet uzun müddətdir ki, bu tenderlərin qalibləri  olan MMC-lərin adlarını açıqlayır.       

Sumqayıtda küçə itlərinin öldürülməsinə etiraz edən iki xanım 4 saylı polis bölməsində vəhşicəsinə döyüldüklərini bildirirlər.

Dünya bazarında neftin qiyməti ucuzlaşsa da Azərbaycanda benzinin qiymətinin enməməsinə ekspertlər “hökumətin neft itkilərini benzinin qiymətini sabit saxlamaqla kompensasiya etmək cəhdi” kimi şərh ediblər.

“Ekspress”  ABŞ-ın siyasi məhbusların azad edilməsi tələbinə rəsmi Bakının “daxili işlərimizə qarışmayın” reaksiyasnı önə çəkib.

Qəzet bu ilin ötən müddəti ərzində ölkədə 54 minə yaxın nikah, 8 min boşanmanın qeydə alındığını bildirir.

“Exo”  2000-2013-cü illərdə əməyin mühafizəsi xərclərinin 5,6 dəfə artmasına baxmayaraq, istehsalatda həlak olanların sayının 1,7 dəfə artmasını ilk plana çıxarıb.

“Bizim yol” Türkiyənin enerji naziri Taner Yıldızın “rəsmi Ankara keçən ilin sonunda “nurçu”lara uduzsaydı onlar Bakını da ələ keçirəcəkdilər” kimi bəyanatını “sensasiyalı açıqlama” kimi ilk səhifədə yerləşdirib.

ABŞ-ın rəsmi Bakıdan siyasi məhbusların azad olunması tələbinə rəsmi Bakının kəskin mənfi reaksiyasını qəzet “Bakı-Vaşinqton arasında növbəti gərginlik” sayır.

“Yeni Müsavat”  baş nazirin keçmiş müavini Abbas Abbasovun Moskva və Bakıda fəallaşaraq çevrilişə hazırlaşması kimi iddiasını ilk səhifəyə çıxarıb. Eyni zamanda qəzet rəsmi Bakının “Rusiyaya tərəf təhlükəli əyilməsi” barədə xəbərdarlıq edir.

Qərbin təzyiqlərindən sonra Rusiyanın Azərbaycana vədlərlə yaxınlaşmasına, iqtidarın da buna müsbət qarşılıq verməsinə ekspertlər “Moskvanın vədinə inanmaq olmaz” xəbərdarlığını ediblər.     

Qəzet hüzr məclislərində yemək verilməsi qadağasının məmurlarla hüzr sahibi arasında “rüşvət predmeti”nə çevrildiyini bildirir.