Mətbuat-Monitorinq 18.09.15

Rəsmi qəzetlər dövlət başçısı İlham Əliyevin Kürdəmir və Ağsu rayonlarına səfərləri haqda xəbərləri ilk səhifələrdə yerləşdiriblər.

“Azadlıq” qəzeti Avropa liderlərinin Azərbaycanda rəsmi Bakının repressiyalarını müzakirə etmələrini manjetə çıxarıb.

Kremlin Qarabağda rus “sülhməramlıları”nı yerləşdirmək istəməsini politoloq Hikmət Hacızadə “Rus qoşunlarının Azərbaycana qayıtması” kimi dəyərləndirir.

Bir sutkadan sonra “bandotdel”də saxlandığı üzə çıxan “Meydan Tv”nin əməkdaşı Şirin Abbasova qondarma “polisə müqavimət” adı ilə 30 sutka inzibati cəza verilib.

İsmayıllıda 12 yaşlı məktəbli İsmət Əsədovun məktəbli forması alına bilməməsinə görə intihar etməsini atası və dayısı təsdiq edib.

Nəqliyyat Nazirliyi Nəqliyyat Departamentinin əməkdaşları zorla Paşa Kərimovun avtomobilinə soxularaq 100 manat pulu və pul qabını götürüb gediblər.

Qəzet rayon avtomobillərinin paytaxta buraxılmaması qərarının “memarı” baş nazirin müavini Abid Şərifovun cinayət məsuliyyətinə cəlb olunaraq cəzalandırılmasının lazım olduğunu bildirir.

Qəzet ekspertlərə isnadən əhalinin “böhran büdcəsi” adlanan 2016-cı il büdcəsinin ağır nəticələrini öz üzərlərində hiss edəcəkləri barədə xəbərdarlıq edir.

2008-ci ildən Gürcüstanda fəaliyyət göstərən Heydər Əliyev adına Azərbaycan-Gürcüstan Universitetinin lisenziyası ləğv edilib.

“Ekspress” erməni müxalifətçi Vahan Martiroyanın Azərbaycandan siyasi sığınacaq istəməsini ön plana çıxarıb.

Qəzet bir tərəfdən neftin qiymətdən düşməsini, digər tərəfədən hasilatın azalmasını “neftdən ikiqat zərbə” kimi dəyərləndirir.

“Exo” ekspertlərə isnadən ölkədə hər il diabet xəstələrinin sayının orta hesabla 15% artmasını “şəkər diabeti epidemiyası” kimi diqqət mərkəzinə çəkib.

Ekspertlər ölkə iqtisadiyyatı neft hasilatı asılılığından xilas olmayınca Azərbaycanın “risk qrupu ölkələri” arasında yer alacağını bəyan edirlər.

“Novoe Vremya” Avropa liderlərinin Azərbaycandakı vəziyyəti müzakirə etmələrini “Qərbin Azərbaycana təzyiqinin güclənməsi kimi önə çəkib.

“Bizim yol” vergi borcu olan hər kəsin istintaqa çağırılacağı haqda Vergilər Nazirliyinin mövqeyini ilk səhifəyə yerləşdirib.

Qarşıdakı illər üçün büdcənin hər il 10/1-nin borca gedəcəyini deyən ekspertlər təhsil, səhiyyə işçilərinə maaş artımından  ümidlərini kəsmək tövsiyəsi veriblər.

“Yeni Müsavat ” nazir Ziya Məmmədovun hakimiyyətin “gözündən düşməsi”ni ilk səhifəyə çıxarıb.

Bu ilin avqustunda döyülərək qətlə yetirilən jurnalist Rasim Əliyevin atası Məmmədəli Əliyev qarşı tərəflə barışığın mümkün olmamasını bəyan edib.

Moskvada Dini İctimai Komitə sədri Heydər Camal Azərbaycanın Rusiyaya yaxınlaşmasını “Rusiyanın problemlərini bölüşməsi riskinə getməsi” adlandırır. 

YAP-ın qurucularından olan Əli Əlirzayev YAP-ın parlament siyahısından ən yaxşı halda 40-50 nəfərin deputat mandatı ala biləcəyi barədə bəyanat verib.

Yerlərdə YAP-ın parlament rəqiblərinə qarşı ağlasığmaz təzyiqlərin başlamasını qəzet hakimiyyətin “müxalifətsiz seçki” taktikası kimi dəyərləndirir.