ABŞ səfiri Robert Sekuta Azərbaycana azad seçkilər arzulayıb

ABŞ səfiri Robert Sekuta traffikinqlə mübarizə sahəsində Amerika-Azərbaycan əməkdaşlığını yüksək qiymətləndirib.

“İnsan alveri bütün ölkələrin, o cümlədən ABŞ-ın üzləşdiyi bəladır. Mən traffikinqə qarşı mübarizə sahəsində Azərbaycan dövləti ilə əldə olunmuş uğurları qeyd etmək istərdim”, - R.Sekuta 1862-ci il sentyabrın  22-də Avraam Linkoln tərəfindən elan edilən qulların azad edilməsi haqqında proklamasiyanın növbəti ildönümü ilə bağlı keçirilən tədbirdə bildirib.

O vaxtdan 150 ilin keçməsinə baxmayaraq, müasir dünyada hələ də qul əməyindən istifadə edilir, seksual quldarlıq və insan alverinin digər formalarına yol verilir.

Səfir insan alverinə qarşı mübarizə sahəsində Azərbaycanın uğurlarını, o cümlədən qanunvericilik bazasının təkmilləşdirilməsi sahəsində addımları qeyd edib ki, bu da Dövlət Departamentinin illik hesabatında əksini tapıb.  

Səfir həmçinin traffikinqlə mübarizə məqsədilə tərəflərin həyata keçirdikləri birgə proqram və layihələri də qeyd edib.

Jurnalistlərin xahişilə mətbuat azadlığı və demokratiya sahəsində vəziyyəti şərh edən R.Sekuta deyib ki, bu məsələlər daim ABŞ ilə Azərbaycan hökuməti arasında dialoqun diqqət mərkəzindədir.

ABŞ-ın mövqeyi hökumətlərin, konqresmenlərin, senatorların bəyanatlarında əksini tapıb.

“Biz azərbaycanlıların görmək istədikləri güclü, demokratik, inkişaf edən Azərbaycan naminə əməkdaşlığı davam etdirməyə hazırıq”, - səfir vurğulayıb.

Qarşıdakı parlament seçkilərinə toxunan R.Sekuta deyib ki, Azərbaycan müstəqilliyini bərpa etdikdən sonra ABŞ hər seçkinin demokratiyanın inkişafı yolunda addım olması üçün əməkdaşlıq edib.

“Prezident İlham Əliyev bildirib ki, 1 noyabr parlament seçkiləri azad və ədalətli olacaq. Biz də bunu istəyirik”, - səfir vurğulayıb.—06С--