Mətbuat-Monitorinq 20.04.13

Rəsmi və hökumətyönlü qəzetlər dövlət başçısı İlham Əliyevin Makedoniya baş nazirini və nümayəndə heyətini qəbul etməsi, Bakıda Su İdmanı Sarayının təməlqoyma mərasimində iştirakı, Olimpiya Hərəkatı və İdman Muzeyinin tikintisi ilə bağlı 1 milyon manat ayrılması, Mikayıl Cabbarovun təhsil naziri təyin edilməsi barədə sərəncam imzalaması haqda yazırlar. 

Bundan əlavə, bu qəzetlərdə hüquq müdafiəçisi Leyla Yunusun, tanınmış yazıçılar Əkrəm Əylilsi və Rüstəm İbrahimbyovun ünvanına təhqir və böhtan olan yazılar dərc edilib.  

“Azadlıq” qəzeti YAP-çı deputat Siyavuş Novruzovun fahişəliyi leqallaşdırması təklifinin cəmiyyətdə etirazla qarşılanması məsələsini manjetə çıxarıb.

Ömürlük cəza almış məhbuslardan 19 nəfəri işlərinə yenidən baxılması tələbilə saxlandıqları Qobustan qapalı həbsxanasında aclıq aksiyasına başlayıblar. 

“Azadlıq” qəzetinin redaktoru Rahim Hacıyev oxucu və ictimaiyyət dəstəyi olmasa, yaxın həftələrdə qəzetin fəaliyyətinin dayancağı xəbərdarlığı edib. 

Həbsdə olan keçmiş deputat Gülər Əhmədova və bacısı Gülnar Quliyevanın adları “Kamran B.Ə” mənzil tikinti şirkətinin 6 milyonluq maliyyə fırıldağında hallanır. 

Gəncə sakinləri şəhərin “20 yanvar” istirahət parkının YAP icra katibi Əli Əhmədov tərəfindən zəbt edildiyini, burada iki şadlıq sarayı tikildiyini bildirirlər. 

İslam Partiyası prezident seçkilərində “ədalətli seçki və əxlaqlı hakimiyyət uğrunda islami hərəkat” adı ilə kampaniya aparacağını bəyan edib. 

Qəzet təhsil naziri Misir Mərdanovun yerinə Mikayıl Cabbarovun təyinatını “Paşayevlərin “Misir inqilabı”” adlandırır. 

“Muzkomediya”dan Azərbaycanın tanınmış ictimai-siyasi xadimi Şıxəli Qurbanovun adının götürülməsinə qızı Gülnarə Qurbanova “iqtidarın ölülərə qarşı mübarizəsi” şərhi verib. 

“Zerkalo” qəzeti Misir Mərdanovun yerinə təhsil naziri gətirilən Mikayıl Cabbarovun təyinatına “yeni nazir nəyə nail olacaq?” sualını gündəmə gətirir.

“Ekspress” qəzeti Naxçıvanda əsgərin zabiti güllələməsinə hərbi prokurorluğun “xüsusi amansızlıqla adam öldürmə” maddəsilə cinayət işi açmasına diqqət çəkir.

Qarabağ münaqişəsinin davam etdiyi 20 il ərzində ermənilərin Azərbaycana vurduqları ziyanın həcminin 300 milyard dollardan çox olduğu bildirilir. 

“Exo” qəzeti ekspertlərə isnadən ölkə yollarının 50%-nin normalara uyğun olmadığını və sürücülərin buna görə əmək haqlarının 5%-ni yollarda itirdiklərini nəzərə çatdırır.

Qəzet Gürcütan prezidenti Mixail Saakaşvilinin Tbilisidə keçirdiyi mitinqdə azərbaycanlıların iştirakına “rəsmi Bakının Bdzina İvaişviliyə cəbhə açması” şərhi verir. 

“Bizim yol” qəzeti təhsil naziri Misir Mərdanovun ardınca hakim komandada nazirilər Səfər Əbiyev və Füzuli Ələkbərovun, komitə sədrləri Qərib Həsənov, Arif Vəliyev və Ramiz Həsənovun “vurulacaq”larını iddia edir. 

Azərbaycanın qızıl alışından sonra bu qiymətli metalın dünya bazarında dəyərinin enməsilə 400 milyon dollar ziyana düşməsinə ekspertlər “Neft Fondunun dövlətin pullarını batırması” şərhi veriblər. 

“Yeni Müsavat” qəzeti 15 ildən çox təhsil naziri olan Misir Mərdanovun vəzifədən çıxarılmasını “uzunömrlü nazirlərdən birinin gözlənilən sonu” adlandırır.