Mətbuat-Monitorinq 21.02.15

Rəsmi qəzetlər dövlət başçısı İlham Əliyevin “Kitabi-Dədə Qorqud”un alman dilində ilk tərcümə və nəşrinin 200 illiyinin qeyd edilməsi haqda sərəncamın və bəzi qanunlara dəyişikliklərlə bağlı rəsmi sənədlərin mətnlərini ilk səhifədə yerləşdiriblər.  

“Azadlıq” qəzeti son vaxtlar həbsdə başına gələn hadisələrlə ölkə mətbuatının gündəmində olan məhkum Lamiyə Quliyevanın azadlığa buraxılmasını manjetə çıxarıb.

Rusiya azərbaycanlılarının “Azərros” qurumu daxilində baş nazirin keçmiş müavini Abbas Abbasov və səfir Polad Bülbüloğlunün tərəfdarları arasında qarşıdurma yaranıb, qəzet qarşıdurmaya görə səfir P.Bülbüloğlunu ittiham edir.

Elman Türkoğlu adlı şəxs həbsdə olan jurnalist Xədicə İsmayıla böhtan atmaq iddiası qaldırıb, Binəqədi məhkəməsi təcridxana şəraitində işə baxır, vəkil Elton Quliyev buna etiraz edib, hakim etirazı qəbul etməyib, proses fevralın 23-nə təyin edilib.

İqtisadi ekspertlər müxtəlif rəsmi qurumların əli ilə sahibkar və obyektlərin kütləvi cərimələnməyə məruz qoyulmasını “iqtidarın sahibkarlardan xərac toplaması” kimi dəyərləndiriblər.

Bakıda səfərdə olmuş ABŞ dövlət katibinin köməkçisi Viktoriya Nulandın müxalifətlə görüşməməsini ekspertlər  bunu “müxalifətin qəbul edilməməsinin yox, dünyanın probleminin hakimiyyətlə olmasının göstəricisi” adlandırıblar.

Qəzet radikal dini təriqət üzvlərindən ibarət mütəşəkkil cinayətkar dəstənin ələ keçdiyini nəzərə çatdırır.

“Ekspress”  minlərlə evin sökülməsilə bağlı məhkəmələrdə qaldırdığı iddialara ARDNŞ-nin “bəzi qeyri-qanuni evlərin qanuniləşə biləcəyi” şərhini önə verib.

Ölkənin hüquq-mühafizə orqanları aparılmış yoxlama tədbirləri nəticəsində 63 saxta diplom aşkarlayıblar.

Ölkə ekspertləri ilin sonuna kimi 1 dolların 90 qəpiyə bərabər olacağını proqnozlaşdırırlar.

“Novoe Vremya”  Minsk Qrupu həmsədrlərinin fotosu fonunda uzun müddət fəaliyyətlərinə baxmayaraq, Qarabağ probleminin həll edilməməsini “nə qədər bəyan etmək olar?, Nə qədər tələb etmək olar!” mövqeyini önə çəkib.

Məhkum Lamiyə Quliyevanın azadlığa çıxmasını yazan qəzet ancaq həbsxanaların problemlərinin bununla qurtarmadığını da nəzərə çatdırır.

“Bizim yol” ABŞ-ın “Stratfor” təşkilatının Azərbaycana dair hesabatında Rusiya ilə Qərb arasında qarşıdurmanın Azərbaycan üçün enerji sahəsində açdığı böyük imkanlar, həm də risklər haqda mövqeyini diqqət mərkəzinə çəkib.

Qəzet ölkə əhalisinin banklardakı əmanətlərini sürətlə dollara dəyişməsi kimi ajiotajın davam etdiyini bildirir.

Təhsil nazirinin Humanitar Fənlər Gimnaziyasının bağlanması haqda qərarı bu məktəbdə təhsil alan şagirdlərin və onların valideynlərinin aksiyasına səbəb olub.

“Yeni Müsavat”  məhkum Lamiyə Quliyevanın azadlığa çıxmasını ilk səhifəyə çəkərək bunu Şəmkir rayonunun keçmiş icra başçısı Aslan Aslanovun “girovu”nun həbsdən buraxılması kimi dəyərləndirir.

Fəaliyyəti dayandırılan “Ayna-Zerkalo” qəzetlərinin redaktoru Elçin Şıxlı ABŞ dövlət katibinin köməkisi V.Nuland ilə görüşdə həbsdə olan jurnalist Rauf Mirqədirovla bağlı məlumat verdiyini bildirir.