Manatın məzənnəsi dollara nisbətdə 33% düşüb

Fevralın 21-dən dolların manata nisbətən rəsmi məzənnəsi 1 dollar – 1,05 manat, avro isə 1,19 manat səviyyəsində müəyyənləşib.

Bu barədə Azərbaycan Mərkəzi Bankının (AMB) məlumatında deyilir.

“Bu qərar milli iqtisadiyyatın şaxələndirilməsinə əlavə stimullar yaratmaq, onun beynəlxalq rəqabət qabiliyyətini və ixrac potensialını daha da gücləndirmək, bu əsasda tədiyyə balansının və ölkənin beynəlxalq ödəmə qabiliyyətinin strateji dayanıqlılığını təmin etmək məqsədilə qəbul edilib”, - “AzərTac” Dövlət İnformasiya Agentliyinin saytında yerləşdirilmiş məlumatda deyilir.

  Manatın məzənnəsinin korreksiyası həmçinin xarici ticarət tərəfdaşımız olan əksər ölkələrin milli valyutalarının son dövrlərdə əhəmiyyətli ucuzlaşmasının milli iqtisadiyyatın rəqabət üstünlüklərinə mənfi təsirlərini neytrallaşdırmağa yönəlib.

Mərkəzi Bank müəyyən edilmiş dəhliz çərçivəsində valyuta bazarında iştirakını davam etdirəcək, məlumatda bildirilir.

Beləliklə, manatın məzənnəsi dollara nisbətdə 33,5%, avroya nisbətdə 30% düşüb.

Qeyd edək ki, bu qərar hakimiyyətin və AMB-nin əvvəlki qərarlarına birbaşa ziddir. Belə ki,  bundan öncə manatın dünya bazarındakı vəziyyətə uyğunlaşdırılması üçün onun məzənnəsinin tədricən və az nəzərəçarpacaq dərəcədə endiriləcəyindən danışılırdı.

Bugünkü qərar maliyyə bazarında çaxnaşmanın, dollar və avroya tələbatn kəskin artmasına səbəb olacaq. Həmçinin idxal kəskin bahalaşacaq.

Rəsmi şəxslər hələlik heç bir şərh vermirlər.—06D-