Mətbuat-Monitorinq 22.01.14

Rəsmi qəzetlər dövlət başçısı İlham Əliyevin Gəncə və Göygöl rayonlarına səfəri, səfər çərçivəsində bəzi obyektlərin açılışında iştirakı haqda yazırlar.

Bundan əlavə, bu qəzetlər dövlət başçısı İ.Əliyevin Gəncə şəhəri və Göygöl rayonunun sosial-iqtisadi  inkişafı üçün müaviq olaraq 5 milyon və 2 milyon manat vəsait ayırması, Azərbaycanın tanınmış ziyalısı Əlibəy Hüseynzadənin anadan olmasını 150 illiyinin qeyd olunması haqda sərəncamlarının mətnlərini dərc edib. 

“Azadlıq” qəzeti “Human Rights Watch” təşkilatının rəsmi Bakını onlarla siyasi fəalı, tənqidçi jurnalisti qondarma ittihamlarla həbsə almaqda, dinc nümayişləri dağıtmaqda ittiham edən daha bir hesabat yaymasını ilk səhifəyə çıxarıb.

Səyyar qəzet satışına polis qadağaları ilə bağlı toplantı keçirən redaktorlar və yayım firmaları bu hala etiraz olaraq birgə aksiya keçirmək haqda qərar qəbul ediblər.

Problemli kreditlərin 1 milyard manatı ötməsini ekspertlər “bankların yüksək faiz dərəcələri, əhalinin sosial-iqtisadi durumunun yaxşı olmamasının göstəricisi” kimi dəyərləndiriblər.

“Zerkalo” Rusiyadakı ictimai-siyasi durumu təhlil edərək Soçi olimpiadasından sonra rəsmi Kremlin postsovet məkanında siyasətinin daha aqressiv olacağını yazaraq buna “Rusiya hücuma keçir” şərhini verir.

“Ekspress” Qarabağ münaqişəsinin tənzimlənməsinə əsas maneələrdən biri olan rəsmi Kremlin “hər şey tərəflərdən asılıdır, biz onların yerinə iş görə bilmərik” bəyanatını səsləndirməsinə diqqət çəkir.

Avropada siyasi mühacirətdə olan müsavatçı Eldəniz Yusubovun oğlu İsa Yusubov Niderlandın Azərbaycan səfirliyində vəzifəyə təyin edilib. 

“Novoe Vremya”  Qarabağ cəbhəsində erməni tərəfin atəşkəsi sürəkli pozmaqla müharibəni bərpa təxribatı yaratmaqda ittiham edir. 

Qəzet “Vəhabi kabusu Azərbaycanı dolaşır” məqaləsində sələfiləri ölkəyə fəlakət gətirməkdə ittiham edir. 

“Bizim yol” ARDNŞ-nin 20 min işçini ixtisara salmağa hazırlaşdığını önə çəkib. 

“Yeni Müsavat” erməni tərəfin bütün cəbhə boyu durumu gərginləşdirməsini “Qarabağda müharibə durumu” kimi dəyərləndirir.

REAL Hərəkatının təmsilçisi Natiq Cəfərli AŞPA-nın Azərbaycan üzrə həmməruzəçilərinin əqidəsizliyinə “bu adamlar Avropa dəyərlərinə təhqirdir” şərhini verib. 

Həbsdə olan gənc siyasi fəallar daxili dartışmada olan aparıcı müxalifətə “klassik müxalifət ideyalarımızı öldürməklə məşğul olub və yaxın 2-3 ayda gözlənilən addımlar atılmazsa yolların ayrılacaq” xəbərdarlığını ediblər.