Mətbuat-Monitorinq 23.11.15

Rəsmi qəzetlər KİV haqqında qanuna dəyişikliklər barədə fərmanın və digər rəsmi sənədlərin mətnlərini ilk səhifələrdə yerləşdiriblər.

“Azadlıq” qəzeti “MTN işi” ilə bağlı üzə çıxan cinayətləri önə çəkib. Bu fonda Rabitə Nazirliyinin həbs edilən aparat rəhbəri Vidadi Zeynalovun evindən külli miqdarda qızıl məmulatların aşkarlanmasını nəzərə çatdırır.  

“MTN işi” ilə bağlı yazılara görə “strateq.az” saytının rəhbəri Elxan Şükürlü ölkə prokurorluğuna çağırılıb, ona bəzi əsası olmayan “xəbərlər” yayması ilə bağlı xəbərdarlıq edilib, E.Şükürlü “MTN işi” ilə bağlı indiyədək xəbərdarlıq alan jurnalsitləri bu haqda danışmamaqda ittiham edib. “MTN işi” ilə bağlı yazan jurnalistlərin son vaxtlar ölkə prokurorluğu tərəfindən təzyiqlərə məruz qalmalarını  ekspetlər “hakimiyyətin öz ifşasından qorxması” ilə əlaqələndirirlər. MTN-in bir qrup yüksək vəzifəli şəxslərinin rüsvayçı cinayətlərə görə həbs edilmələrinə baxmayaraq, nazirin birinci müavini Mədət Quliyevin qurum əməkdaşlarının 99%-nin “təmiz fəaliyyət göstərməsi” bəyanatını “gülməli optimizm” sayırlar.

Qəzetin yazdığına görə, Rusiya xüsusi xidmət orqanları Azərbaycandan İŞİD-ə pul köçürmələri qeydə alıb və RF prezidenti Putin bununla bağlı xüsusi komissiya yaradıb.

AXCP Naxçıvanda bir neçə üzvünün şərlənərək həbs edilmələri və işgəncələrə məruz qalmalarını “hakimiyyətin sivil rəqabətdən qorxması” kimi şərh edir.    

Azərbaycandakı siyasi həbsləri “rejimin tənqidçilərə münasibətinin göstəricisi sayan “The Vaşinqton Post” qəzeti dünya birliyinə “Əliyevdən siyasi məhbuslara mərhəmət yox, qeyd-şərtsiz azad olunmaları” tələbi irəli sürür.

Həkim-ekspert Ceyhun Allahverdiyev verdiyi saxta rəylə Milli Şuranın  sədri Cəmil Həsənlinin qızı Günel Həsənlinin etmədiyi yol qəzasına görə həbsinə səbəb olub.  Bu “həkim” 2013-cü il prezident seçkilərində C.Həsənlinin səhhəti baxımdan prezidentliyə “yararsız” olması haqda arayış da veribmiş.

Sosial şəbəkələrdə cümhuriyyət banisi Məhəmmədəmin Rəsulzadə haqda müsbət paylaşımlarına görə müğənni Qistət Məmmədzadəyə efiq qadağası qoyulub.

Avropaya qaz nəqli nəzərdə tutan TAP layihəsini maliyyələşdirən konsorsium təsisçilərinin kapitallarını geri çəkmələrini ekspertlər layihənin reallaşması üçün ciddi risklərin yaranması kimi şərh ediblər.

Dünya bazarında neftin gələcək qiymətini təhlil edən ekspertlər onun 20 dollara enəcəyini, bu faktın Azərbaycanda işsizliyi daha da artıracağını, əhalinin sosial durumunu ağırlaşdıracağını proqnozlaşdırırlar.

“Yeni Müsavat”  Türkiyədə fəaliyyət göstərən azərbaycanlı iş adamı Mübariz Mənsimovun yükdaşımalarında şübhəli məqamlar üzə çıxdığı üçün ABŞ Federal Təhqiqatlar Bürosunun istintaqa başladığını, şirkətin ofislərindəki bütün kompüterlərin hard disklərinin götürüldüklərini ilk səhifəyə çıxarıb.

Ekspertlər inhisarçılıq və korrupsiya səbəbindən Azərbaycanın özünü heç bir ərzaq məhsulu ilə təmin edə bilmədiyini bəyan edirlər.   

Dövlət başçısı İlham Əliyevin yaxın zamanlarda Parisə gözlənilən  səfərinə qəzet nə üçünsə “Bakının Vaşinqtonla münasibətlərinə yenidən baxması” hesab edir.

Azərbaycanda İŞİD-in kifayət qədər dəstəkçisi olduğunu deyən ekspertlər Rusiya mətbuatında İŞİD-ə maliyyə dəstəyi verənlərin içində Azərbaycanın adının çəkilməsinə “bu rəsmi Bakını ciddi düşündürməlidir” şərhini veriblər.

Dövlət Bayrağı Meydanı İdarəsinin keçmiş rəisi Rəşad Məmmədovun cinayət işində “zərərçəkən” kimi ifadə verən Zabil Salmanov “MTN işi”ndən sonra bu ifadəni MTN-də güclü təzyiqə məruz qalması nəticəsində verdiyini bildirir.