Mətbuat-Monitorinq 24.11.15

Rəsmi qəzetlər dövlət başçısı İlham Əliyevin ABŞ dövlət katibinin köməkçisinin müavininin başçılıq etdiyi nümayəndə heyətini qəbul etməsi haqda xəbəri, bəzi fərman və sərəncamların mətnlərini ilk səhifələrdə yerləşdiriblər.  

“Azadlıq” qəzeti MTN-in keçmiş şefi Eldar Mahmudovun tamamilə təcrid olunması iddiasını önə çəkərək bunu onun həbsinə “hazırlıq” getməsi adlandırır.

MTN və Rabitə Nazirliyində üzə çıxan cinayətləri iqtidar yandaşlarından Ariz Abduləliyev YAP-ın qurucularından olmuş Sirus Təbrizlinin vaxtilə bu partiyaya dediyi “simasız quldurlar partiyası” nöqtəsinə gəlib çatması kimi dəyərləndirib.

MTN və Rabitə Nazilriyində üzə çıxan rüsvayçı cinayətlər fonunda qəzet 2005-ci ildə Zülfüqarlı qardaşlarına məxsus zavodların əllərindən hansı qanunsuz üsullarla alınmasına dair genişhəcmli məqalə dərc edib.

Dövlət qurumlarının ölkə üzrə elektirk istehlakından 40% çox enerji işlətməsini önə çəkən qəzet bunu “Azərenerji” rəhbərini “bitirəcək”  fakt hesab edir.

Vergilər Nazirliyi Əmlak Komitəsinin sədri Kərəm Həsənovun qardaşı Malik Həsənova məxsus “Azinko”da yoxlama aparıb, bir qrup işçi həbs edilib.

Həbsdə olan tanınmış hüquq müdafiəçisi Leyla Yunusun səhhəti pis olsa da Penitensiar Xidmət rəhbərliyi onun xəstəxanaya köçürülməsinə razılıq vermir.

“Ekspress” Milli Elmlər Akademiyası Coğrafiya İnstitutunun əyalətlərin boşalması, Abşeronun yüklənməsi xəbərdarlığını ön plana çıxarıb.

Bəzi dövlətlərin xüsusi xidmət qüvvələrinin Azərbaycandan terrorçu İŞİD-ə pul getməsi haqda xəbərləri Dini Komitənin sədri Mübariz Qurbanlı “əsassız” adlandırır. 

“Novoe Vremya”  Malik Hüseynov adlı şəxsin kredit borcuna görə özünü yandırması fonunda “Azərbaycanda “intihar epidemiyası”na necə qalib gələk?” sualını diqqət mərkəzinə çəkir.

“Bizim yol” Bakı sakini Malik Hüseynovun kredit borcuna görə özünü yandırmasını “dəhşətli intihar olayı” adı ilə ilk səhifədə yerləşdirib.

Qəzet avtomobil bazarının çökməsini önə çəkərək böhran və hökumətin bəzi qərarlarının ölkəyə avtomobil idxalını 4 dəfə azaltdığını bildirir.

“Yeni Müsavat”  Milli qəhrəmanlar Rövşən Əkbərov və Mədət Quliyevin mərkəzi hakimiyyətdə güclənməsini ilk səhifəyə çıxararaq bunu “iqtidarın iki generala önəm verməsi” kimi dəyərləndirir.

Qəzet MTN generallarının Bakı torpaqlarını necə zəbt etməsi, MTN generallarına bağışlanan obyekt və torpaq sahələri haqda irihəcmli məqalə ilə çıxış edib. 

Qəzet Türkiyədə fəaliyyət göstərən iş adamı Mübariz Mənsimovun keçmiş MTN şefi Eldar Mahmudovla əlaqələrinin üzə çıxdığını, E.Mahmudovun atasının adına olan gəminin terrorçu İŞİD-lə neft biznesində istifadə oldunduğunu iddia edir. Bu mövqe ilə bağlı M.Mənsimova məxsus “Palmali” şirkəti qəzetə təkzib versə də qəzet “əldə etdiymiz məlumatlar əsassız deyil” qarşılığını verib.

Qəzet sələfi təriqətinə aid şəbəkənin Azərbaycanda əsasən istilik sistemləri, gümüş əşyalar və ətir satışını inhisara aldığını bildirir.   

Ekspertlər ərzağın bahalaşması və evlərin ucuzlaşmasını “böhran dövrünün əlamətləri və ilkin simptomları” kimi dəyərləndiriblər.