Mətbuat-Monitorinq 26.11.13

Rəsmi və iqtidaryönlü qəzetlər dövlət başçısı İlham Əliyevə “Jurnalistlərin dostu”  mükafatının təqdim olunması xəbərini ilk səhifələrə çıxarıblar. 

Bu qəzetlər İnzibati Xətalar Məcəlləsinə edilən dəyişikliklər barədə yazırlar. 

“Azadlıq” qəzeti fransalı jurnalistlərin Bakıda verilən hədiyyədən imtina etmələri xəbərini ilk səhifəyə çıxarıb. 

AXCP sədri Əli Kərimli ölkədə işləyən əhalinin 34%-nin aylıq maaşının 94 manatdan 150 manat arasında olduğu haqda açıqlama verib.   

Dövlət başçısı İlham Əliyevin müxalifətlə dialoq mesajına aparıcı müxalifət partyaları “dekorativ xarakterli, səmimilikdən uzaq fikir” şərhini veriblər. 

“Facebook”da fəallığına görə fərqlənən Abdul Abdulov həbs edilib. “Bandotdel”ə aparılan fəala  “İnternetdə həddini aşması” xatırladılıb.  

Müstəqil media mənsubları İlham Əliyevlə görüşə toplaşan həmkarlarına “həmin tədbirə toplaşanların bir ələ baxması” mövqeyini səsləndiriblər.

Tanınmış ABŞ jurnalisti Emi Qudman Əliyevlərlə Kojeni arasında rüşvət qalmaqalını yenidən gündəmə gətirib.

Nazir müavinlərinin əmlakları barədə araşdırma aparıldığını yazan qəzet PA-nın bununla bağlı icra hakimiyyətlərindən siyahı tələb etdiyini bildirir. 

“Zerkalo”. PA-nın şöbə müdiri Novruz Məmmədov rəsmi Bakının Vilnüsdə keçiriləcək “Şərq Tərəfdaşlığı” sammitində Avropa İttifaqı ilə assosiativ üzvlük yox, “Tərəfdaşlıq” sazişi imzalamasını təklif edir. 

“Ekspress” Moskva polisinin miqrantlara “qan uddurduğunu yazır, Diaspora Komitəsinin sədri “azərbaycanlıların belə münasibətə layiq olmadıqlarını” bəyan edibr.

Bəzi şəxslərin “Məşədi Dadaş məscidi”ndə partlayış törətməsinə hazırlıqla bağlı məscidin imam-camaatı Hacı Şahin Həsənli MTN-də izahat verib.

“Exo” Azərbaycanda orta statistik ailənin həftədə yeməyə 100 manata qədər pul xərclədiyini yazır. 

“Novoe Vremya” Azərbaycanın Avropa İttifaqı, yoxsa Avrasiya İttifaqı ilə saziş imzalamaq seçimi arasında qalmasını “çətin seçimlə üz-üzə” kimi dəyərləndirir. 

“Bizim yol” ölkə prokurorluğunun tanınmış QHT nüamyəndələri Anar Məmmədliyə, Bəşir Süleymanova və Elnur Məmmədova ölkədən çıxmağa yasaq qoymasını ilk səhifəyə çıxarıb. 

Ədliyyə Nazirliyinin ictimai qurumları qeydiyyata almamasını qəzet “nazirliyin qeydiyyat labirinti, vətəndaşların birləşmə azadlığına qeyri-rəsmi veto” kimi dəyərləndirir. 

“Yeni Müsavat” noyabrın 28-29-da Vilnüsdə “Şərq Tərəfdaşlığı” toplantısından sonra Rusiyanın Azərbaycana münasibətinin  qətiləşəcəyini yazaraq bunu “Azərbaycanın “qış müharibəsi”nə hazırlaşması” adlandırır.

Ölkənin şimal-qərb bölgəsində partlayış, yanğın və qətllərin törədilməsini yazan qəzet Rusiya faktoruna diqqət yetirməyi vacib sayır.

Media mənsublarının metropoliten stansiyalarında qəzet-kitab satışının bərpa olunacağı bəyanatına metrpoliten rəisi Tağı Əhmədov “olmayacaq” cavabını verib. 

Dövlət başçısı İlham Əliyevlə media mənsublarının görüşünü təhlil edən media ekspertləri görüşün ölkədə medianın taleyinə müsbət təsiri olacağına birmənalı münasibət ifadə etmirlər.  

Ekspertlər Azərbaycanda dini məzhəb zəminində qarşıdurma yaratmaq barədə çağırışları və buna olan cəhdləri ciddiyə almağı tövsiyyə  edirlər.