Mətbuat-Monitorinq 27.05.14

Rəsmi qəzetlər dövlət başçısı İlham Əliyevin qəbulları haqda xəbərləri , bir qrup məhbusun əfv olunması ilə bağlı imzalanan fərmanın mətnini ilk səhifələrə yerləşdiriblər.  

“Azadlıq” qəzeti Rusiya xarici işlər naziri Lavrovun Ukrayna prezidenti seçilən Poroşenko ilə dialqoa hazır olması bəyanatını “Putinin Ukrayna önündə geri çəkilməsi” adlandırır.

Rəsmi Bakının Qərblə söz “savaş”ında olduğu bir vaxt nazir Kəmaləddin Heydərovun ABŞ Daxili Təhlükəsizlik Departamentinin əməkdaşını qəbul etməsini qəzet “hakimiyyətdə narahatlıq yaratması” kimi dəyərləndirir.

Dünən verilən əfv fərmanında çoxsaylı siyasi məhbusun adlarının olmamasını qəzet İlham Əliyevin “dünyaya meydan oxuması” hesab edir.

AXCP-yə icarəyə verdiyinə görə Bakıdakı mülkü partladılaraq sökülən Azər Əsgəov bunda nazir Kəmaləddin Heydərovu təqsirli bilərək onu “Azərbaycanın jandarmı” adlandırır.

“Ekspress” mədəniyyət və turizm naziri Əbülfəz Qarayevin lisenziya almayan otellərin I Avropa Oyunları zamanı fəaliyyətinin qadağan olunacağı bəyanatını səsləndirməsinə diqqət çəkir.

“Exo”  Xəzər dənizi sahilində yerləşdiriləcək külək generatorları vasitəsilə 5 dəfədən artıq elektrik enerjsii istehsalının və bununla da 3-4 mlrd. kub metr qaza qənaət etməyin mümkünlüyünü önə çəkir.

“Novoe Vremya”  ekspertlərin Transxəzər qaz kəmərinin iqtisadi məsələ olmaqdan çox siyasi məsələ olması iddiasını ilk səhifəyə çıxarıb.

ABŞ-ı Azərbaycanda demokratiyanın olmasına maraqlı olmamaqda ittiham edən qəzet mövqeyini “ABŞ-a Azərbaycanda demokratiya lazımdırmı?” sualı ilə bildirir.

“Bizim yol” mayın 26-da imzalanan əfv fərmanı ilə az, cəmi 5 nəfər siyasi məhbusun azadlığa çıxmasını önə çəkərək diqqəti hüquq müdafiəçilərinin amnistiya aktı gözlədiklərinin üzərində cəmləşdirir.

Siyasi ekspertlər ARDNŞ ilə Rosneft arasında birgə əməkdaşlığa dair sazişin imzalanmasına “sənədin iqtisadi tərkibindən çox siyasi tərəfləri olması” şərhini veriblər.

“Yeni Müsavat”  iyunun 19-da yeni əfv fərmanının veriləcyi haqda etibarlı xəbərin alındığını yazaraq bunu “vicdan məhbusları üçün 19 iyun əfvi” adlandırır.

Azərbaycanın müxalif siyasətçiləri Ukrayna seçkilərini bütün dünyada ciddi demokratik dəyişikliklərin baş verəcəyi dönüş nöqtəsi sayırlar.

Şuşa şəhərini 1992-ci ildə ermənilərə təslim edən Elbrus Orucovun Baş Qərargaha doğru “irəlilədiyini” yazan qəzet bunu iqtidarın ordu rəhbərliyində regional balanslaşma siyasətinə üstünülk verməsi adlandırır.

Qəzetin iddiasına görə, yaxın aylarda iqtidar komandasında nazirdən tutmuş komitə sədrlərinə qədər xeyli məmurun vəzifədən uzaqlaşdırılacağı gözlənilir.