Mətbuat-Monitorinq 29.08.15

Rəsmi qəzetlər dövlət başçısı İlham Əliyevin parlament seçkilərinin noyabrın 1-nə təyin edilməsi haqda sərəncamının mətnini dərc ediblər.

Ölkədə 100-dən yuxarı siyasi məhbus olduğu halda “Azərbaycan” qəzeti ilk səhifəyə “İnsan hüquq və azadlıqlarının qorunması Azərbaycan üçün prioritet məqsəddir” adlı yazı yerləşdirib. 

“Azadlıq” qəzeti İ.Əliyevin A.Rəsizadəni baş nazir vəzifəsindən azad etməməsini ilk səhifəyə çıxararaq bunu bu post uğrunda mübarizənin kəskin xarakter almasndan ehtiyatlanması ilə əlaqələndirir. 

Qəzet ölkədə insan haqları, sosial-iqtisadi durum haqda mövzuya geniş yer verib.

Almaniynın çoxmilyonlu tiraja malik “Bild” qəzetində Arif və Leyla Yunusların həbsi fonunda Azərbaycandakı repressiyalar barədəki məqalənin tərcüməsi qəzetdə əksini tapıb.

Təhsil haqqını ödəyə bilməmək səbəbilə 1171 tələbə qeydiyyatdan keçməyib.

Ölkədə istehlak mallarının bahalaşmasından sonra alver üçün İrana gedənlərin axını sürətlənib.

İsrail və Avropanın Azərbaycan neftindən imtina etməsinə ekspertlər “valyuta daxilolmalarının, o cümlədən neft dollarlarının azalacağı” şərhini veriblər.

Bəzi ekspertlər bankların dollar kreditlərini manata çevirmələrini “dolların məzənnəsi qalxanda vətəndaşların risklərini müəyyən qədər bankların öz üzərinə götürmələri” kimi qiymətləndirir.

Parlament seçkilərindən sonra 6-8 nazirlik və komitənin birləşdiriləcəyini nəzərə çatdırır. Ekspertlər ölkədə süd və ət məhsullarına tələbat çox olduğu halda onun daha az tələbat olan Rusiyaya ixracını “absurd” sayıblar.

“Ekspress” nikaha girməklə bağlı məcburi tibbi müayinənin bəzi gənclərdə ağır xəstəliklər  aşkarladığını ortaya çıxarmasını önə çəkib.

“Novoe Vremya” Türkiyədə Azərbaycan, Türkiyə və Türkmənistan xarici işlər nazirlərinin görüşü fonunda Xəzərdə enerji layihələrinin reallaşdırılmasına “Xəzər yenidən gündəlikdə” mövqeyini diqqət mərkəzinə çəkib.

Qəzet ölkədə parlament seşkilərinin keçirilməsi vaxtının müəyyən olunmasına “seçkilərin vaxtı müəyyən, o demokratik olacaqmı?” sualını gündəmə gətirir. 

“Bizim yol” dərman pereparatlarının qiymətlərinin tənzimlənməsindən sonra firmaların qiyməti ucuzlaşdırılan dərmanları ölkəyə gətirmək istəməmələrini “dərman bazarında böyük ajiotaj” kimi dəyərləndirərək ilk səhifəyə yerləşdirib.

Hakimiyyətin sosial şəbəkələrin fəaliyyətini sertifikatlaşdırmaq səylərini media eksperti Ələsgər Məmmədli “sertifikatlaşdırma mahiyyət etibarilə lisenziyalaşdırmadır, bu, kommunikasiya vasitələrinin lisenziyalaşdırılmasıdır, icazə sistemidir, nəticəsi də odur ki, icazə verilməsə burada fəaliyyət göstərə bilməzlər” kimi şərh edib.

“Yeni Müsavat” Bakıda biznes və ya məişət məsələsi ilə bağlı keçmiş polis Nadir İbrahimovun güllələnməsini ilk səhifəyə çıxarıb.

Qəzetin iddiasına görə, Xalça Muzeyinin direktoru ildə 250 min manat pul silir və məsələni Korrupsiya İdarəsi araşdıracaq.

Ekspertlər neftin qiyməti qalxmadığı halda ölkədə büdcə kəsirinin 4 milyard manat olacağı barədə xəbərdarlıq ediblər.

Baş nazirin müavini Abid Şərifovun qardaşına məxsus “EBRASON” şirkətinin işləmək üçün Qazaxıstana apardıqları 180 azərbaycanlının  viza rejimini pozması adı ilə həbsləri davam edir, baş nazir müavinisə hər hansı tədbir görmür.

Dərman pereparatlarının qiymətlərinin tənizmlənməsindən sonra apteklərdə dərman qıtlığı yaranıb.