Miqrantları qəbul edən ölkə qeydiyyata alacaq

Azərbaycana bir aydan çox müddət üçün gələn əcnəbilərin qeydiyyatı asanlaşır. Milli Məclisin bugünki iclasında Azərbaycanda daimi yaşayan vətəndaşlığı olmayan şəxslər və 30 gündən çox yaşayan əcnəbilər haqqında sənədlərə, habelə yaşayış yeri üzrə qeydiyyat haqqında qanuna düzəlişlər qəbul edilib.

Parlamentin hüquq siyasəti və dövlət quruculuğu komitəsinin sədri Əli Hüseynlinin sözlərinə görə, bəzi müddəalar xarici qonaqların həyatını çətinləşdirir. “Miqrasiya xidmətinin digər dövlət orqanları ilə fəalliyətinin koordinasiyası məsələlərini düşünmək onlar üçün, çətin ki, maraqlı olsun”, deyə o qeyd edib.

İndi, sadələşdirmələrə uyğun olaraq, mənzil sahibləri, mehmanxana, istirahət evi, sanatoriya, pansionat, kempinq, turizm bazası administratorları üç iş günü ərzində müvafiq icra hakimiyyəti orqanına müvafiq anket və əcnəbinin pasportunu təqdim etməlidir. Deputat Zahid Orucun sözlərinə görə, əvvəllər icra hakimiyyəti orqanı dedikdə müstəsna olaraq Miqrasiya Xidməti nəzərdə tutulurdusa, indi əcnəbini dəvət edən bütün idarələr icra hakimiyyəti orqanı hesab olunur.

Müraciət daxil olduqda əcnəbi yaşadığı yer üzrə qeydiyyata alınır və 48 saat ərzində müvafiq dövlət orqanı tərəfindən ona qeydiyyat haqqında məlumat verilir. Ölkəyə gəlmək üçün viza alan şəxslərin qeydiyyatı vizada göstərilən müddət üçün həyata keçirilir.

Azərbaycana gəlişi üçün viza tələb olunmayan şəxslərin qeydiyyatı 90 günlük həyata keçirilir. Qeyd edək ki, əvvəllər Azərbaycana vizasız gələn şəxslər üçün qeydiyyat müddəti 30 gün təşkil edirdi.

Yeni qaydalara görə yaşayış (qalma) yeri üzrə qeydiyyat üçün dövlət rüsumu alınmır. Gecikmə olduqda əcnəbi və ya vətəndaşlığı olmayan şəxs müvafiq icra hakimiyyəti orqanına məlumat verir. -17D-