Bakı istintaq təcridxanasında İlqar Məmmədova qarşı təxribat

Çərşənbə axşamı Avropa Şurasının baş katibi Turbörn Yanqlandın köməkçisi  “Respublika alternativi” (ReAl) vətəndaş hərəkatının rəhbəri İlqar Məmmədovun vəkili Xalid Bağırovla telefonla danışıb. 

X.Bağırov Turan-a bildirib ki, AŞ baş katibinin köməkçisi Bakı istintaq təcridxanasında İ.Məmmədova qarşı təxribat barədə məlumatlardan narahatlığını bildirib, insidentin təfərrüatı və istintaqın gedişi ilə maraqlanıb.

Martın 4-də sosial şəbəkələrdə İ.Məmmədovun müraciəti yayılıb. O bildirib ki, onunla bir kameraya hüquq-mühafizə orqanlarının   keçmiş işçisi yerləşdirilib. Həmin adam özünü şübhəli aparıb. Əvvəlcə İ.Məmmədovdan tibbi hissəyə müraciət etməyi, sonra isə  buraxılması üçün peşman olması barədə ərizə yazmağı təklif edib. Sonra o, Məmmədova təklif edib ki, ölkədən getsin, sonra yenidən tibbi hissəyə köçürülməsi ilə bağlı təşviqat aparıb, intihar barədə danışıb.  

Vəkilin sözlərinə görə, bu məlumat Facebook-da yayıldıqdan sonra həmin adam təcili olaraq martın 4-də saat 23:00-a yaxın kameradan çıxarılıb və məlum olub ki, əvvəllər Ədliyyə Nazirliyində çalışıb.

“Onun gerçəkdən dustaq olması  və ya dustaq qismində kameraya salınması hələlik məlum deyil”, - X.Bağırov qeyd edib.

Onun sözlərinə görə, AŞ baş katibinin köməkçisi qeyd edib ki, Avropa Şurası Məmmədovun işi üzrə istintaqın gedişini bundan sonra da diqqətlə izləyəcək.

Bundan əvvəl T.Yanqland İ.Məmmədovun vəkilləri –Xalid Bağırovla Fuad Ağayevə şəxsən telefon edərək istintaqın gedişi ilə maraqlanıb.

İ.Məmmədov həmçinin AŞ siyasi araşdırmalar üzrə Bakı məktəbinin rəhbəridir.

X.Bağırov həmçinin bildirib ki, yaxın günlərdə müdafiə tərəfi İ.Məmmədovun hüquqlarının bərpası və onun azad edilməsi üçün yeni addımlar atacaq.

Vəkillər İ.Məmmədovun qanunsuz həbsi ilə bağlı Strasburq məhkəməsinə şikayət göndəriblər.

ReAl hərəkəti 2013-cü il 16 oktyabr prezident seçkilərində İ.Məmmədovun prezidentliyə namizədliyini irəli sürüb. 

*İlqar Məmmədov və Müsavat Partiyasının sədr müavini Tofiq Yaqublu fevralın 4-də İsmayıllı hadisələri ilə bağlı həbs olunublar. Onlara qarşı CM-in 233 (ictimai asayişin pozulmasına yönələn hərəkətlərin təşkili və onlarda iştirak) və 315.2-ci (sağlamlığa və həyata təhlükə törədən güc tətbiq etməklə polisə müqavimət göstərmək) maddələri ilə ittiham irəli sürülüb. Yerli və beynəlxalq demokratik ictimaiyyət əmindir ki, onlar müxalifətçi fəaliyyətinə görə siyasi motivlərlə təqib olunurlar. —06B—