Mövsüm Səmədov yenidən karserə salınıb

12 saylı cəzaçəkmə müəssisəsində həbs cəzası çəkən İslam Partiyasının lideri Mövsüm Səmədov yenidən karserə salınıb. Bu, mart ərzində üçüncü dəfədir cəza kamerasına salınır.

Vəkil Yalçın İmanovun Turan-a verdiyi məlumata görə, Səmədov martın 6-da artıq beş günlük karserə salınmışdı. Bu müddət başa çatdıqdan sonra onu üç günlük cəza kamerasına salıblar.

Bayram ərəfəsində Səmədovun ailə üzvləri cəzaçəkmə müəssisəsində onunla görüşmək istəyiblər. Amma onlara deyiblər ki, indi Səmədov 2 aylıq karserə salınıb. Vəkilin sözlərinə görə, Cəzaların İcrası Məcəlləsində maksimum cəza kamerasına salınma müddəti 15 gündür.

İmanov izah edib ki, Novruz bayramı ilə əlaqədar uzunmüddətli qeyri-iş günləri olduğuna görə martın 27-dən əvvəl Səmədovla görüşə və onun cəzası ilə bağlı məsələni aydınlaşdıra bilmir.

Vəkil hesab edir ki, Səmədovun yenidən saxlanma rejimi daha sərt olan Qobustan həbsxanasına göndərilməsini əsaslandırmaq üçün ona qarşı təxribat törədilir.

Penitensiar Xidmətdən şərh almaq mümkün olmayıb. Səmədov 2011-ci ilin yanvarında hakimiyyəti ələ keçirməyə cəhd, qanunsuz silah saxlama ittihamı ilə bir qrup AİP fəalı ilə birlikdə həbs olunub və 12 il azadlıqdan məhrumetmə cəzasına məhkum edilib.

Avropa Məhkəməsi artıq onun şikayəti üzrə kommunikasiyaya başlayıb. –06B-