Bakı/12.07.17/Turan: Həbsdəki jurnalist Əfqan Muxtarlının xanımı və gürcü vəkili iyulun 12-də Gürcüstanda açılmış cinayət işinin materialları ilə tanış olublar. Bu haqda jurnalistin xanımı Leyla Mustafayeva bildirib. O, aparılan araşdırmadan narazı olduqlarını deyib.
"Bizi içində heç nə olmayan cinayət işinin materialları ilə tanış etdilər. Cinayət işi 1800 səhifəlikdir, ancaq içində heç nə yoxdur", - Mustafayeva deyir.
O cinayət işi materialları içində müşahidə kameralarının görüntülərinin olduğunu da bildirib:
"Həmin video görüntülərin ikisində Əfqanla bağlı görüntü var. Onun da birinə baxa bildik. Texniki problemlərə görə, ikinci disk açılmadı. Bizə bildirdilər ki, Əfqanın aparıldığı marşrut üzrə Daxili İşlər Nazirliyinin nəzdində olan müşahidə kameraları həmin gün işləməyib. O kameralardan bir dənə də olsun görüntü götürmək mümkün olmayıb. Bizə bildirdilər ki, yollarda quraşdırılan və polisin nəzdində olan kameraların sistemi yenilənir və təmir işləri gedir. Nə baş veribsə məhz həmin gün Əfqanın çörək aldığı mağaza və ona bitişik aptekin də kameraları işləməyib. Əfqanın keçdiyi keçiddəki 10-adək müşahidə kamerası da işlək vəziyyətdə olmayıb".
Jurnalistin xanımı vəkillərin hüquqi prosedurlara uyğun olaraq gərəkli addımlar atacağını qeyd edib.
Jurnalist Əfqan Muxtarlı mayın 29-da müəmmalı şəkildə Tbilisidən Bakıya gətirilib. Jurnalist özü Gürcüstandan oğurlanaraq Azərbaycana gətirildiyini bildirir.
O AR Cinayət Məcəlləsinin 315.2-ci maddəsi ilə (hakimiyyət nümayəndəsinə güc tətbiq etməklə müqavimət göstərmə) ittiham olunub. Bundan sonra jurnalistə qarşı CM-nin daha 2 maddəsi - 318.1 və 206.1 maddələri ilə (sərhədi qanunsuz keçmə və qaçaqmalçılıq) də ittiham irəli sürülüb. Barəsində 3 aylıq həbs-qətimkan tədbiri seçilib.
Rəsmi Bakı iddia edir ki, Muxtarlı sərhədi qanunsuz keçərkən Azərbaycanda saxlanılıb və iqtidarın fikrincə, bu məsələni siyasiləşdirmək düzgün deyil.
Əfqan Muxtarlının Azərbaycan gətirilib həbs edilməsi ilə bağlı Gürcüstanda da cinayət işi açılıb. Bu ölkənin prezidenti jurnalistin xanımını qəbul edərək şikayətlərini dinləyib.-0-
Cəmiyyət
-
Qısa zamanda abunəçilərə altı innovativ məhsul təqdim edən “Bakcell”, reklam və marketinq dünyasının mühüm beynəlxalq müsabiqələrindən biri olan “Felis” tərəfindən “Ən Uğurlu Rebrendinq” mükafatına layiq görülüb.
-
Beynəlxalq Demokratik Yenilənmə Koalisiyası (ICDR) və Forum 2000 Fondu Azərbaycanda vətəndaş cəmiyyətinə qarşı artan təzyiqlərdən dərin narahatlıqlarını ifadə edərək birgə bəyanat yayıb. Qruplar, hökumətin vəkillər, jurnalistlər, aktivistlər və insan hüquqları müdafiəçilərinə qarşı geniş miqyaslı təzyiqləri gücləndirdiyini, ölkədə müxalif səslərin sistematik olaraq susdurulduğunu vurğulayıblar.
-
60 milyon auditoriyası ilə dünyanın 100 nüfuzlu şəbəkəsindən biri olan, təhsil və bacarıqların qiymətləndirilməsi sahəsində aparıcı beynəlxal təşkilat Times Higher Education (THE) xəbərlər buraxılışında “İqlim sammiti başlayan kimi azərbaycanlı alimin azad edilməsinə çağırışlar” başlığı ilə geniş yazı dərc edib. Hər il dünya Universitetlərinin reytinqini hazırlayan THE yazır ki, mədən yanacağı istehsalçısı dünya liderlərinin toplantısına ev sahibliyi edərkən müxaliflərə qarşı sərt tədbirlər görür. Hüquq müdafiə qrupları COP29 iqlim konfransına ev sahibliyi edən Azərbaycan hökumətini mədən yanacağı siyasətini tənqid etdikdən sonra saxlanılan alimin azad edilməsinə çağırır.
-
Cümə axşamı paytaxtda hava tutqun olacaq, səhər az yağış yağa bilər. Mülayim cənub-şərq küləyi əsəcək. Havanın temperaturu gecə müsbət 8 +10, gündüz müsbət 12 + 15 dərəcə olacaq. Rütubət gecə və gündüz rütubət 65-75 faiz olacaq.
Rəy yaz