General Novruzəli Orucov: �Üç övladım var, üçünü də prezidentə qurban verməyə hazıram�

"Dövlət məmuru öz ailə üzvlərini idarə edə bilmirsə vəzifədən çıxarılacaq", - prezident İlham Əliyev ötən gün hökumətin bu ilin birinci yarısında ölkənin sosial-iqtisadi inkişafına və qarşıdakı vəzifələrə həsr olunmuş iclasında bildirib.

"Mən müşavirələrin birində də demişəm ki, icra başçılarının fəaliyyətinə, o cümlədən bu göstəriciyə görə qiymət veriləcək. Bir daha deyirəm ki, dekabrın 15-də mənə geniş arayış təqdim edilsin və ondan sonra həm yüksək qiymət veriləcək, həm də cəza tədbirləri görüləcək. Mən dövlət məmurlarının davranış normaları ilə bağlı dəfələrlə öz fikirlərimi bildirmişəm və bir daha demək istəyirəm. Hər bir dövlət məmurunu işə təyin edəndə verdiyim tapşırıqlar arasında bunlar da var ki, məmur təvazökar olmalı, xalqa xidmət etməli, xalqla bir yerdə olmalı, özünü xalqdan yuxarı tutmamalıdır", - o bildirib.

Qeyd edək ki, dövlət başçısının müvafiq sərəncamı ilə Səfərbərlik və Hərbi Xidmətə Çağırış üzrə Dövlət Xidməti rəisinin həqiqi hərbi xidmətə çağırış üzrə müavini - Həqiqi Hərbi Xidmətə Çağırış Baş İdarəsinin rəisi Novruzəli Orucov işdən çıxarılıb. Generalın oğlu Rüstəm Orucov yol hərəkəti qaydalarını pozduqdan və avtobus sürücüsünü döydükdən sonra saxlanılıb. Baş Prokurorluğun məlumatna görə, 2017-ci il iyulun 3-də Bakı şəhər sakini Rüstəm Orucov sürücülük hüququndan məhrum olunmasına baxmayaraq, idarə etdiyi BMW markalı 10-OG-300 dövlət nömrə nişanlı avtomobillə yol hərəkəti qaydalarını pozduğuna görə ona əsaslı irad bildirmiş sürücü Sənan Səmədovun idarə etdiyi marşrut avtobusunu 8 dayanacaq təqib edərək sərnişinlərin narahatlığına və insanlarda vahiməyə səbəb olub, vətəndaşların gözü qarşısında bir qrup şəxslə həmin sürücüyə xəsarətlər yetirərək xuliqanlıq edib.

Faktla bağlı iyulun 4-də Binəqədi Rayon Polis İdarəsinin istintaq şöbəsində Cinayət Məcəlləsinin 221.2.1-ci (bir qrup şəxs tərəfindən xuliqanlıq) maddəsi ilə cinayət işi başlanıb. R.Orucov həmin maddə ilə ittiham olunaraq məhkəmənin qərarı ilə barəsində həbs qətimkan tədbiri seçilib.

"Siz bilirsiniz məni niyə çıxarıblar. Mənim üç övladım var və hər birini prezidentə qurban verməyə hazıram. Çünki prezident mənə yüksək ad verib və vəzifəyə təyin edib", - işdən çıxarılan məmur yerli KİV-ə bildirib.

"Mənim Ali Hərbi Məktəbi bitirməyim barədə göstərişi prezidentin atası, ümummilli lider Heydər Əliyev verib. İşdən çıxarılmağıma gəlincə, prezidentə bir söz deyə bilmərəm. Vəzifəyə o təyin edir, o da çıxarır. Allah cənab prezidenti qorusun. Mən bir daha deyirəm ki, özümü də, övladlarımı da prezidentə qurban verməyə hazıram. Oğlumun işi üzrə istintaq davam edir. Başa çatdıqdan sonra hər şey bəlli olacaq", - o bildirib.

Eyni zamanda Olke.az saytının məlumatına görə, işdən çıxarılan məmur 85 saylı avtobusun sürücüsü, oğlunun döydüyü Sənan Səmədova hədə-qorxu gəlib.

S.Səmədov nəşrə bildirib ki, N.Orucov ona telefon edərək hədələyib: "Bu gün Novruzəli Orucov mənə telefon edərək dedi ki, niyə onun icazəsi olmadan mətbuata müsahibə vermişəm. Sonra hədələdi ki, daha KİV-ə heç nə deməyim. Mənə açıq şəkildə dedi ki, onun əleyhinə nəsə söyləsəm mənim üçün pis olacaq", - Olke.az sitat gətirib.

Qeyd etmək lazımdır ki, ötən gün iclas zamanı dövlət başçısı deyib ki, məmur özü və onun ailə üzvləri təkəbbürlü davranmamalıdırlar.

"Ancaq buna baxmayaraq, bəzən hələ də görürük ki, həm məmurlar özlərini apara bilmirlər, kobud səhvlər buraxırlar, həm də ailə üzvləri hesab edirlər ki, onların xüsusi imtiyazı var. Azərbaycanda heç kimin heç bir imtiyazı yoxdur. Mən demişəm ki, o dövlət məmuru öz ailə üzvlərini idarə edə bilmirsə vəzifədən çıxarılacaq və belə də oldu. Azərbaycanda xuliqanlıqla, özbaşınalıqla məşğul olanlar cəzalandırılır və cəzalandırılmalıdır. Heç kimə heç bir güzəşt edilmir və mənim son qərarlarım onu bir daha təsdiqləyir, hamı nəticə çıxarsın", - o bildirib.

Qeyd edək ki, dövlət başçısı məmurlara bununla bağlı dəfələrlə xəbərdarlıq edib. 2013-cü ilin fevralında deyib: "Vəzifəli şəxslərin övladları xuliqanlıq edir, özlərini cəmiyyətdə apara bilmirlər. Kim onlara bu statusu verib? Kimə arxalanırlarsa onları vəzifəyə mən təyin etmişəm və mən də lazım bilsəm çıxararam. Əgər bilsəm ki, kiminsə ailə üzvü haradasa xuliqanlıq edir, özünü apa bilmir, həmin şəxs həbs ediləcək, atası işdən çıxarılacaq".

Bu bəyanat İsmayıllı rayonunda yüksək vəzifəli məmurun oğlu yol qəzası törətdikdən və taksi sürücüsünü döydükdən sonra verilib. Ancaq bu cür hallar təkrarlanır.