Nardaranda gizlicə FH rejimi tətbiq edilib (Video - YENİLƏNİB)

Nardaran qəsəbəsində gizlicə fövqəladə hal rejimi tətbiq edilib. Axşam düşsə də, qəsəbədə polis və Daxili Qoşunların qüvvələri qalmaqdadır, onlar əsas mövqeləri tutublar. 

Yerli sakinlərə toplaşmağa icazə vermirlər. Qəsəbənin mərkəzi hissələrində nəqliyyatın hərəkəti qadağan edilib.

Bugünki əməliyyat zamanı bir neçə nəfər saxlanılıb. Evlərdə axtarışlar zamanı hətta məişət baltaları götürülüb. 

Qəsəbədə əvvəlki kimi elektrik enerjisi yoxdur. Axşama yaxın mobil internet işləyib. Noyabrın 26-da xüsusi əməliyyat zamanı həlak olanların dəfni ilə bağlı dəqiq məlumat yoxdur. Bəzi məlumatlara görə, onları gizlicə dəfn ediblər. Lakin yerli ağsaqqallar həlak olanların doğmalarına istinadla bununla bağlı məlumat olmadığını bildirirlər. 

Hakimiyyətyönlü KİV Nardaranda asayişin bərqərar olduğunu və barrikadaların söküldüyünü bildirir. 

Lakin yerli icmalar hələ noyabrın 29-da etiraz aksiyasının başa çatdığını və barrikadaların söküldüyünü xatırladırlar. Sabahki günün də ağır keçəcəyi gözlənilir. Dekabrın 2-si şiələrin Məhərrəm ayında qeyd etdiyi İmam Hüseynin qətlinin 40-cı günüdür. Adətən həmin gün minlərlə dindar Nardaranda matəm mərasimlərinə yığışır. -06D-

2015 Dekabr 01 (Çərşənbə axşamı) 16:22:02

Nardaranda yerli əhalinin saxlanılması davam edir. Güc qurumlarının nümayəndələri qapıları qırıb evlərə daxil olur, kişiləri evdən çıxarıb polis maşınlarına mindirir.

Yerli sakinlərdən biri bildirib ki, hələ gecə onların evinə silahlı polis əməkdaşları gəlib. Bu zaman ailə başçısı saxlanılıb, o, qanunsuz silah saxlamaqda ittiham edilib, halbuki silahı polis özü gətirib.

Bundan sonra elə həmin gün evlərinə az sayda jurnalist daxil olub, ev sahibi onlara ərini və oğlunu dindirməyə apardıqlarını, qaytarmağa söz verdiklərini bildirib.

Bu gün Nardaranda ümumilikdə neçə nəfərin saxlanıldığı məlum deyil. Lakin polisin və MTN-in hərəkətləri güc qurumlarının silah və “zərərli” ədəbiyyat axtardığını göstərir.

DİN bu ittihamlarla bağlı şərh vermir. Qəsəbə əvvəlki kimi güc qurumlarının əməkdaşları tərəfindən mühasirəyə alınıb, kənar şəxslər Nardarana buraxılmır. -06В-

2015 Dekabr 01 (Çərşənbə axşamı) 11:00:14

Dekabrın 1-də günortaya yaxın Nardaranın İmam Hüseyn meydanında  hüquq-mühafizə orqanlarının qüvvələri cəmləşib. Bu barədə Turan-a yerli sakinlər bildiriblər.

Meydanda zirehli texnika dayanıb. Yaxınlıqda Bünyadovların evində xüsusi əməliyyat keçirilir.

Noyabrın 26-da ilahiyyatçı Tale Bağırzadə və onun tərəfdarları həmin evdə saxlanılıblar.

Jurnalistlər hadisə yerinə buraxılmır.

Qeyd edək ki, xüsusi təyinatlı polis qüvvələrinin arasında qadınlar var, onlar qadın sakinlərin üzərində axtarış aparırlar.–06D-

* * *

Bazar ertəsi axşamdan Nardaran qəsəbəsi ətrafında polis və daxili qoşunların postları gücləndirilib. Lakin məsələ təkcə Nardaranla məhdudlaşmayıb.

Yerli sakinlər Turan-a bildiriblər ki, çərşənbə axşamı səhərdən polis Maştağa qəsəbəsinə girişdə hərəkəti bağlayıb. Bir neçə kilometrdən – Zabrat qəsəbə dairəsindən başlayaraq postlar qurulub. Yalnız yerli sakinlərə məxsus avtomobillər buraxılır. İkinci post Maştağaya  bilavasitə girişdə (Məmmədyarovun abidəsi) qoyulub. Polis avtomobil və avtobuslarda olan vətəndaşların sənədlərini yoxlayır.

DİN, MTN və Baş Prokurorluq birgə bəyanatla çıxış edərək dekabrın 1-də səhər Nardaranda yeni xüsusi əməliyyatın  başlandığını, qəsəbəyə Daxili Qoşunlar, MTN texnika və qüvvəsinin yeridildiyini bildirib.

“Əhalidə saxlanılan qanunsuz silah və hərbi sursatların yığılması üzrə əməliyyat keçirilir”, - məlumatda deyilir.

Bəzi xəbərlərə görə, qoşunlar yolayırıcıları və əsas magistral yolları tutublar, yoxlamalar və saxlamalar başlayıb. Rəsmi məlumatlara görə, hakimiyyətə silahın saxlandığı yer məlumdur.

Noyabrın 26-da polis 12 qumbara, 4 avtomat, 4 tapança və digər sursat götürüb.

Qeyd edək ki,  noyabrın 26-da Nardaran hadisələrində həlak olanların meyitləri gecə saatlarında ailələrinə təhvil verilib.  Dekabrın 1-də Nardaranda dəfn gözlənilir.

Eyni zamanda Nardaranın girəcəyində postlar gücləndirilib, Daxili Qoşunların bölmələri gətirilib. Qəsəbədə əvvəlkitək elekrik enerjisi, qaz, telefon rabitəsi yoxdur.

Hakimiyyət həlak olan gənclərin dəfn mərasiminin ciddi etiraz yürüşünə çevrilə biləcəyindən ehtiyatlanır. Bu məqsədlə hüquq-mühafizə qüvvələri başqa yerlərdən Nardarana girişi maksimim məhdudlaşdırıblar. Dekabrın 2-də şiələr İmam Hüseynin şəhid olması ilə matəmin 40-cı gününü qeyd edəcəklər. Bu səbəbdən vəziyyət daha da çətinləşib.

Nardaran məscidi bu günün qeyd edildiyi əsas mərkəzdir. Hər il bu mərasimə 20-30 min adam toplaşır. Bu il mərasim polislə toqquşma zamanı həlak olanların dəfni ilə eyni vaxta düşür. Yerli sakinlər 1400 il İmam Hüseynin namərdcəsinə qətlə yetirilməsilə bugünkü hadisələr arasında paralellər aparırlar.-05B-