Naxçıvanda traffikinqə qarşı mübarizə mövzuzunda konfrans keçirilib

Naxçıvanda İnsan Alverinə Qarşı Dünya Mübarizə Gününə həsr olunan beynəlxalq konfrans keçirilib. Bu barədə Azərbaycan DİN bildirib.

Tədbir Azərbaycan DİN,  ABŞ Beynəlxalq İnkişaf Agentliyi (USAID),  Beynəlxalq Miqrasiya Təşkilatı tərəfindən təşkil edilib.

USAİD nümayəndəliyinin rəhbəri xanım Mikaela Meredis öz çıxışında qeyd edib ki, Birləşmiş Ştatlar Azərbaycanla birgə insan alverinə qarşı mübarizə aparır. Onun sözlərinə görə, bu işdə uğurlar əldə edilsə də yenə problemlər qalır. İnsan alveri ilə məşğul olanlar hələ də hüquq-mühafizə orqanlarından yayına bilirlər.

2015-ci ilin oktyabrından USAID Beynəlxalq Miqrasiya Təşkilatı ilə birgə Azərbaycanda “İnsan Alverinə Qarşı Mübarizə” layihəsini həyata keçirir. Layihə çərçivəsində insan alveri qurbanları üçün sığınacaqlar yaradılır,   onlara yardım göstərilir.

İnsan alveri qurbanlarına hüquqi, sosial, psixoloji və reabilitasiya yardımı göstərilir.

Meredis insan alverinə qarşı mübarizəyə dair 2014-2018-ci illər üçün Milli Fəaliyyət Planını müsbət qiymətləndirib.

BMT-nin Azərbaycandakı rezident əlaqələndiricisi Qulam İsakzai bildirib ki, hazırda dünyada insan alveri qurbanlarının sayı 20 milyondur. İyulun 30-nun İnsan Alverinə Qarşı Dünya Mübarizə Günü elan edilməsində məqsəd ictimaiyyətin diqqətini bu qlobal problemə yönəltməkdir.

Tədbir zamanı insan alveri müasir dövrün köləliyi adlandırılıb. Konfrans öz işini panel müzakirələrlə davam etdirib. Müzakirələrdə hüquq-mühafizə orqanlarının və güc strukturlarının nümayəndələri iştirak ediblər.–06D--