Nəsimi Rayon Məhkəməsi Anar Məmmədlinin ev dustaqlığı ilə bağlı vəsatətini təmin etməyib (YENİLƏNİB)

Nəsimi Rayon Məhkəməsi Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədlinin barəsində seçilmiş həbs qətimkan tədbirinin ev dustaqlığı ilə əvəz olunması barədə vəsatətini təmin etməyib. 

Məhkəmə vəsatətə bu gün hakim Rəşid Səmədovun sədrliyi  ilə baxıb. 

Vəkil Elçin Sadıqov Turan-a məhkəmənin qərarının qanunsuz olduğunu bildirib. Qərardan apellyasiya şikayəti veriləcək.  

Dekabrın 23-də isə Bakı Apellyasiya Məhkəməsi Anar Məmmədlinin barəsində üç ay müddətinə həbs qətimkan tədbirini qüvvədə saxlayıb. 

Amnesty İnternational Anar Məmmədlini “vicdan məhbusu” kimi tanıyıb. Çoxsaylı beynəlxalq və yerli hüquq- müdafiə təşkilatları Anar Məmmədlinin dərhal azadlığa buraxılması tələbi ilə bəyanatlarla çıxış ediblər.-03B-   

2013 Dekabr 25 (Çərşənbə axşamı) 10:24:15

Dekabrın 25-də saat 11:00-da Nəsimi Rayon Məhkəməsində Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədlinin barəsində seçilmiş həbs qətimkan tədbirinin ev dustaqlığı ilə əvəz olunması barədə vəsatətə baxılacaq. Bu barədə Turan-a vəkil Elçin Sadıqov bildirib. 

Hakim Rəşid Səmədovdur.

Anar Məmmədlinin barəsində dekabrın 16-da 3 ay həbs qətimkan tədbiri seçilib.  O, vergi ödənişindən yayınma, vəzifə səlahiyyətlərindən sui-istifadə, qanunsuz sahibkarlıqda ittiham edilir. A.Məmmədli ittihamları təkzib edir. Cinayət işini siyasi və təşkilatının 9 oktyabr prezident seçkilərini monitorinqi və seçkilərlə bağlı qiymətləndirmələrlə bağlı olduğunu hesab edir.

Dekabrın 23-də Bakı Apellyasiya Məhkəməsi A. Məmmədlinin üç ay müddətinə həbs qətimkan tədbirini qüvvədə saxlayıb. 

Amnesty İnternational Anar Məmmədlini “vicdan məhbusu” kimi tanıyıb. Çoxsaylı beynəlxalq və yerli hüquq- müdafiə təşkilatları A.Məmmədlinin dərhal azadlığa buraxılması tələbi ilə bəyanatlarla çıxış edib.  

Dekabrın 24-də ABŞ-ın ATƏT-dəki səfiri Daniel Baer A. Məmmədlinin dərhal azadlığa buraxılması barədə bəyanat yayıb. “Biz Seçkilərin Monitorinqi və Demokratiyanın Tədrisi Mərkəzinin (SMDTM) sədri Anar Məmmədlinin həbsindən dərin narahatlıq keçiririk. Biz hüquqi proses davam edərkən cənab Məmmədlinin dərhal azad edilməsinə çağırırıq.  Biz bu məsələni Azərbaycan hökumətinin yüksək rütbəli rəsmiləri qarşısında qaldırmışıq və qaldırmaqda davam edəcəyik.  Biz SMDTM-nin və Azərbaycan Könüllülər İctimai Birliyinin üzərində aparılan təhqiqatı yaxından izləməkdə davam edirik”,- sənəddə qeyd olunur.-03B-