NİDA fəalı əfv olunmasını xahiş edir

NİDA Vətəndaş Hərəkatının  və  Vətəndaş Həmrəyliyi Partiyasının üzvü, bloger, 5 il müddətinə azadlıqdan məhrum edilmiş Ömər Məmmədov prezident İlham Əliyevə müraciət edərək əfv olunmasını xahiş edib.

Penitensiar Xidmətin məlumatında deyilir ki, Ö.Məmmədov öz müraciətində yazır ki, təhsilimi davam etdirmək, ölkənin  layiqli vətəndaşı olmaq istəyir. “Odur ki, sizdən xahiş edirəm ki, məni əfv edəsiniz”, - Ö.Məmmədov qeyd edib.

O həmçinin Vətəndaş Həmrəyliyi Partiyasının rəhbərliyinə müraciət edərək  partiya sıralarından çıxarılmasını xahiş edib.

Ö.Məmmədovun ailə üzvləri hələlik belə müraciətin olmasını təsdiqləmirlər.

Xatırladaq ki, Ömər Məmmədov 2014-cü il yanvarın 23-də saxlanılıb. Onun üzərindən 6 qram heroin götürülüb. İyulun 4-də 5 il azadlıqdan məhrum edilib.

Lakin həbsinin əsl səbəbi Facebook-da “AzTV-dən seçmələr” satirik səhifəsini yaratmasıdır. Səhifədə hakimiyyət tənqid olunur, ona dair karikaturalar yerləşdirilir.

 Bu ilin iyulunda NİDA üzvü Şahin Novruzlu da əfv üçün müraciət edib. Sentyabrda altı nəfər NİDA fəalı azad olunmaları üçün dövlət başçısına müraciət edib.-16D-