Milli mentalitetin özəllikləri

Bir neçə ildir ki, müxtəlif rütbəsi və çəkisi olan azərbaycanlı xadimlər müntəzəm olaraq bizi təhqir edən, alçaldan Jirinovskinin hansı cəzaya layiq görülməsi ilə  bağlı mübahisə aparırlar.

Ən çox da rəsmi dairələrin nümayəndələri  və ya onlara işləyən “ictimai xadimlər” canfəşanlıq göstərirdilər.

Geniş çeşiddə cəza nəzərdə tutulurdu: qulağının kəsilməsindən tutmuş Jirinovskinin persona-non qrata (minimum olaraq) elan edilməsinə, Moskvada rəsmi etirazdan tutmuş məhkəməyə verilməsinə qədər. Sonuncu cəza burada yox, bizim Rusiyadakı diasporun nümayəndələri tərəfindən irəli sürülmüşdü.

Bəs nə oldu?

Bizi müntəzəm və açıq şəkildə təhqir edən şəxs Bakıda yüksək səviyyədə qəbul edildi.

Qonaqpərvər ev sahiblərindən soruşmaq istərdim: siz Jirinovskinin söylədikləri ilə razısınız yoxsa o, sizdən üzrxahlıq etmək üçün gəlib?

Hər kəsi və hər şeyi satın almaq, pul verərək medal qazanmaq, pul verərək seçkilərin demokratik olduğunu etiraf etdirmək, pul verərək  Jirinovskini düşməndən dosta çevirmək istəyi müəyyən simptomlardan xəbər verir.

Çətin ki bu qeyri-sağlam təzahürlər bizim hamımıza xas olsun, lakin bu gün bu, hamının adına yazılır.

Bu xəstəlik dərinləşir, onun son təzahürü Andrey Makareviçin Bakı konsertinin ləğv edilməsidir.

Bir düşünün, bu musiqiçi Kremlin Krıma, indi də Şərqi Ukraynaya  qarşı təcavüzünə qarşı səsini ucaltmaqdan qorxmayıb. Başqa sözlə, o, Ukraynanın ərazi bütövlüyünü müdafiə edib.

Bu mövzu sizə tanışdırmı? Deyəsən, o qədər də yox. Jirinovski dəfələrlə açıq şəkildə deyib ki, Dağlıq Qarabağ Ermənistana məxsusdur,  tarixi erməni torpaqlarıdır, azərbaycanlılar isə təcavüzkar, işğalçı və qoyundur.

Buna görəmi onu dəvət edirlər və ehtiramla qəbul edirlər, Makarevicdən isə imtina edirlər?

Hər halda bizim xüsusi mentalitetə malik olmağımız doğrudur və heç nə bizim üçün hökm deyil.

Yeri gəlmişkən, mentalitet barədə türk satiriki Əziz Nesin deyib ki, türklərin 40 faizi ağılsızdır. Onun üstünə düşərək üzr istəməyi tələb ediblər. Satirik cavab verib ki, üzr istəməyə hazırdır və deyib: etiraf edirəm ki, türklərin 60 faizi ağıllıdır.

Maraqlıdır, bizim barəmizdə nə deyərdi?....