Ombudsman istintaq təcridxanasında Gözəl Bayramlı, Əfqan Muxtarlı və Əziz Orucova baş çəkib

Bakı/13.09.17/Turan: İşgəncələrin qarşısının alınması üzrə Milli Preventiv Mexanizm çərçivəsində ombudsman Elmira Süleymanova sentyabrın 12-də 1 saylı Bakı İstintaq Təcridxanasında olub.

Məhbusların saxlanma şəraitinin araşdırılması və onlarla ünsiyyət məqsədilə o, bir sıra təqsirləndirilən şəxslər, o cümlədən Xalq Cəbhəsi Partiyasının sədr müavini Gözəl Bayramlı, jurnalistlər Əfqan Muxtarlı və Əziz Orucovla fərdi məxfi görüşlər keçirib.

Onların toxunduğu məsələlər yerindəcə araşdırılıb, bəzi müraciətlər təmin edilib. Digər məsələlər üzrə ombudsman səlahiyyətləri çərçivəsində kömək etməyi vəd edib

Bəzi məhbuslar istintaqın gedişatından narazılıqlarını ifadə ediblər. Təqsirləndirilən şəxslərə hüquqi məsləhətlər verilib.

Bir müddət əvvəl Bayramlının və Muxtarlının vəkilləri onların səhhətlərində ciddi problemlər olduğunu və onlara keyfiyyətli tibbi yardım göstərilmədiyini bildirmişdilər. -06D-