Bloger Lapşin Azərbaycanı tərk etməzdən əvvəl İlham Əliyevə müraciət edib

Bakı/13.09.17/Turan: Azərbaycan prezidenti tərəfindən əvf olunan bloger Aleksandr Lapşin Azərbaycanı "bir-iki günə" tərk edəcək, bu barədə Turan-a vəkil Eduard Çernin bildirib.

Onun sözlərinə görə, bu gün blogerin anası Bella Lapşina Bakıya gəlib və "bir-iki günə" onlar birlikdə Azərbaycandan gedəcəklər.

Vəkil qeyd edib ki, əvf edildikdən sonra müdafiə tərəfin təşəbbüsü ilə istintaq təcridxanasında intihara cəhd etməsi nəzərə alınaraq, həkim nəzarətində olması məqsədilə Lapşin Mərkəzi Klinik Xəstəxanaya yerləşdirilib.

"Heç cür başa düşə bilmirəm ki, o, niyə belə bir cəhd edib. Axı onun İsrailə göndərilməsi üçün prinsipial razılıq var idi. Oradan (İsraildən) bir-iki səməd göndərilməsi qalmışdı. Yəni onun azad edilməsi yaxın gələcəyin işi idi. Özü də son günlər əvf variantı da müzakirə olunurdu. Aylardır istintaq təcridxanasında onun saxlanma şəraiti də nisbətən yaxşı idi. Bir neçə nəfərin saxlanıldığı kamerada saxlanılsaydı hansısa çətin şəraitdən danışmaq olardı. Amma o, bütün bu müddət ərzində istintaq təcridxanasının sanitar hissəsində saxlanılırdı ki, orada şərait xeyli yaxşıdır. İndi bütün bunlar geridə qalıb və Lapşinin gedişi üçün bütün sənədlər hazırdır", deyə vəkil bildirib.

Onun sözlərinə görə, hazırda Lapşinin vəziyyəti normaldır.

Azərbaycandan getməzdən əvvəl Lapşin Azərbaycan prezidentinə məktubla müraciət edib, əvf üçün ona təşəkkür edib.

Vəkilin sözlərinə görə, məktubda müvəkkili qeyd edir ki, səhvlərini başa düşüb və əməllərinə görə peşmandır.

Dövlət başçısına təşəkkür edən Lapşin daha sonra qeyd edir ki, "Qarabağın əsl Azərbaycan torpağı olduğuna və olacağına dair mübahisəolunmaz dəlillər əldə edib". "Ümid edirəm ki, Qarabağ məsələsi Azərbaycanın ərazi bütövlüyü nəzərə alınmaqla nizamlanacaq", deyə Azərbaycan ərazilərinin tezliklə azad edilməsini arzulayan Lapşinin məktubunda bildirilir. -06D-