Parlamentdə təkliflər və mübahisələr

Cümə günü ölkə parlamenti növbəti plenar iclasını keçirib.

Cari məsələlərin müzakirəsində bir sıra deputatlar 18 oktyabr Dövlət Müstəqilliyi gününün qeyri-iş günü elan olunmasının vacibliyinə toxunublar.

Deputat Fərəc Quliyev dövlət müsdtəqilliyi gününün qeyri-iş günü kimi qəbul olunmasına çağırıb. Müstəqilliyə səs verən o zamanki millət vəkillərindən bəzilərinin səhhətlərinin ağır olduğunu deyən F.Quliyev onların təqaüdlərinin verilməsi ilə bağlı qərar qəbul olunmasını xahişi edib.   

Deputat Vahid Əhmədov Müstəqillik Aktını kimlərin imzalamasından asılı olmayaraq, bu tarixi “şanlı tarix” adlandırıb. Vaxtilə bu zalda müstəqilliyə səs verən deputatlardan biri olduğu üçün 18 oktyabrın qeyri-iş günü elan olunmasını və silsilə tədbirlər keçirilməsini təklif edib. Bundan əlavə, V.Əhmədov da müstəqilliyə səs verən, bu gün vəziyyəti ağır olan keçmiş deputatlara, ailələrinə diqqət yetirilməsi zərurətini vurğulayıb.

İclasda “maraqlı” təkliflər də olub. Belə ki, deputat Aqil Abbas Leyla Yunusa 5 günə viza verən Fransa səfirliyinin ona viza verməməsinə toxunub. Spiker müavini Ziyafət Əsgərov A.Abbasa “Fransa səfirliyindən viza almaq üçün gərək Leyla Yunus olasan”, deyə cavab verib.  

İclas mübahisələrsiz də ötüşməyib. Belə ki, deputat Fazil Mustafa vitse-spiker Ziyafət Əsgərovun deputatlara müraciətdə “başa düşmürsünüz” ifadəsinə etirazını çatdırıb. Deputat Sabir Rüstəmxanlı isə vitse-spiker tərəfindən çıxışlarına “populizm” damğası vurulmasına etiraz ifadə edib. S.Rüstəmxanlı ölkə daxilində sğıorta məsələsinin həll olunmadığını deyərək, xaricə gedən firmalardan sığorta tələbini anlaşılmaz adlandırıb. Z.Əsgərov qanunverici hakimiyyətin təmsilçisi olduğunu unudaraq, cavab nitqində iqtidar nümayəndəsi olduğunu xatırladıb və S.Rüstəmxanlını iqtidarı ittiham etməkdə suçlayıb. -05B-