Patriarx Kirildən Hilal Məmmədovun azadlığa buraxılmasına yardım göstərilməsi xahiş olunub

 Bir qrup rus alimi və Rusiyadakı talış diasporunun nümayəndələri patriarx Kirilə müraciət edərək “Davay, do svidaniya” çarxının müəllifi Hilal Məmmədovun azadlığa buraxılmasına yardım göstərməyə çağırıblar.

O,  iyunun 21-də Bakıda qanunsuz narkotik maddə saxlamaqda ittiham olunub. Bir necə gündən sonra ona qarşı yeni ittiham irəli sürülüb, o, dövlətə xəyanətdə və millətlərarası ədavəti qızışdırmaqda ittiham olunub.

Müraciət müəllifləri H.Məmmədovun ünvanına səslənən ittihamların absurd olduğunu bildirirlər.

“Bu ittihamların absurd, H.Məmmədovun həbsinin qanunsuz olması Azərbaycan, Rusiya və beynəlxalq hüquq müdafiə və dini təşkilatlar tərəfindən tanınıb. “Sizin mərhəmətinizi, dünyadakı nüfuzunuzu bilərək Hilal Məmmədovun azadlığa buraxılmasına yardımçı olmağınızı xahiş edirik”, - müraciətdə deyilir.

Müraciəti O.B.Besov (REA müxbir üzvü, REA Riyaziyyat İnstitutunun şöbə müdiri), K.O.Besov (REA Riyaziyyat İnstitutunun baş elmi işçisi), İsmayıl Şabanov (Rusiya Talış diasporunun rəhbəri), Ataxan Əbilov (hüquq müdafiəçisi, beynəlxalq hüquqçu), müsəlman şiələri dini təşkilatının rəhbəri Fatil Cəfərov imzalayıb.