Prokurorluq baş vermiş partlayışlarda terror izi görmür

Fevralın 13-də Bakının Xətai rayonunda “Lukoyl-Azərbaycan” şirkətinin yanacaqdoldurma məntəqəsində partlayış neft məhsullarının buxarlanamsı nəticəsində yaranan təhlükəli hava-qaz qatışığının alışması səbəbindən baş verib. Bu barədə Baş Prokurorluğun məlumatında deyilir.  

İki nəfərin ölümü ilə nəticələnən partlayış faktı üzrə  Bakı Şəhər Prokurorluğunun İstintaq İdarəsi Cinayət Məcəlləsinin 162.2-ci (əmək mühafizəsi qaydalarını pozma) maddəsilə cinayət işi qaldırıb.

Həmin gün saat 11:00 radələrində Binəqədi rayonu ərazisində yarımçıq tikilinin zirzəmisində baş verən partlayışla bağlı isə bildirilib ki, ilkin araşdırmalarla qaz sızmasından baş verməsi ehtimal edilən partlayış nəticəsində  Binəqədi rayon sakinləri  Fillurə Budaqova,  Afiyət İbadova, Tamella Səfərova, Şücayət Qədimova və Tərlan Kazımov müxtəlif dərəcəli xəsarətləri alıb, avtomobil, yaşayış binası və ticarət obyektlərinə zərər dəyib. Həmin faktla bağlı rayon prokurorluğunda CM-in  314.1-ci (səhlənkarlıq) maddəsi ilə cinayət işi başlanıb.

Xəsarət alan şəxslər  xəstəxanalara yerləşdirilərək onlara ilkin tibbi yardım göstərilib. Hadisələrin baş vermə səbəblərinin müəyyənləşdirilməsi məqsədi ilə cinayət işləri üzrə zəruri ekspertizalar təyin edilib və hazırda istintaq tədbirləri davam etdirilir. —06D--