Yengibar Məmmədov Şirvan çörək zavoduna 230 min manat investisiya qoyur

Əmlak Məsələləri Dövlət Komitəsi Şirvan şəhərində çörək zavodunun 30% səhmlərinin satışı üzrə investisiya müsabiqəsinin nəticələrini elan edib. İnvestor “Roza-Çörək” ASC-yə 12 ayda 230 min manat qoymaq öhdəliyi götürüb. 

ƏMDK-nin məlumatına görə, təkliflər 21-22 yanvarda qiymətləndirilib. Müsabiqədə 2 iddiaçı iştirak edib. Komissiya 25 000 manat məbləğində pul vəsaitinin dövlət büdcəsinə köçürülməsini, habelə İnvestisiya Proqramına əsasən 6 aylıq mərhələlər üzrə 1 il ərzində 230 000 manat məbləğində investisiya qoyuluşunun yerinə yetirilməsini öhdəsinə götürmüş Yengibar Məmmədovu qalib elan edib. Məmmədov 90 günə işçilərə olan 7,1 min manat borcu da ödəyəcək. 

İnvestor təmir-bərpa və yenidənqurma işlərinin aparılması, müəssisədə həmçinin sərinləşdirici içkilər istehsalı sahəsinin yaradılması və onun müvafiq avadanlıqlarla təchiz edilməsi, infrastruktur təminatının yaxşılaşdırılması, dövriyyə vəsaitlərinin  alınması, eləcə də abadlıq-quruculuq işlərinə də vəsait sərf edəcək. Proqram həyata keçirilərkən 10 yeni iş yeri açılacaq. 

Şirvan çörək zavodu 1987-ci ildə istismara verilib. ƏMDK onun gücü, qurğuları, torpaq sahəsi barədə məlumat vermir. “Roza-Çörək” ASC-nin səhmlərinin 70%-nin kimə məxsus olduğu da bilinmir. 

Qanunvericiliyə əsasən, dövlət müəssisələrinin səhmlərinin 25%-dən çoxu təklif edilə bilər. “Roza-Çörək” ASC-nin səhmlərinin 30%-i bundan əvvəl bir zərfdə pul hərraclarında təklif edilib. 08D