Qaçqın və köçgün gənclər arasında kompüter vərdişləri aşağıdır

“Regional İnsan Haqları və Media Mərkəzi” İctimai Birliyi çərşənbə axşamı RATİ-də həyata keçirdiyi layihələrin nəticələrinə dair mətbuat konfransı keçirib. 

Birliyin sədri Xalid Kazimli bildirib ki, hər iki layihəyə QHT-lərə Dövlət Dəstəyi Şurası maliyyə dəstəyi verib. Layihəyə texniki dəstəyi Türkiyə Əməkdaşlıq və Koordinasiya Agentliyi (TİKA) göstərib. TİKA birliyə 8 dəst kompüter hədiyyə edib. İlk layihə qaçqın və köçkün gənclərə kompüter biliklərinin öyrədilməsi olub. Bir il davam edən kurslara bu kateqoriyadan olan 121 gənc qatılıb. Bunlar əsasən Bərdə, Ağdam, Tərtər və Ağcabədi rayonlarında məskunlaşan gənclərdir. Kompüter kurslarında oğlanlar üstünlük təşkil ediblər. Bu layihə qaçqın və köçkün gənclər arasında kompüterdən istifadə qaydalarını bilənlərin səviyyəsinin çox aşağı olduğunu aşkar edib. X.Kazımov kompüter bilgilərinin indiki şəraitdə həm də cəmiyyətə inteqrasiyanın tərkib hissəsi olduğunu deyərək bu tipli layihələri davam etdirməkdə maraqlı olduqlarını açıqlayıb. 

İkinci layihə bu kateqoriyadan olan gənclər arasında dərziliyin öyrədilməsinə həsr edilib. TİKA birliyə texniki dəstək olaraq 10 toxuculuq maşını bağışlayıb. Altı ay davam edən və bu ilin sentyabrında başa çatan dərzilik kurslarını 20 nəfər bitirib. Bu kurslarda qızlar üstünlük təşkil ediblər. Kurslar başa çatdıqdan sonra uğurla imtahan verən 6 nəfərə sertifikatlar təqdim olunub. Amma işlə təmin olunmaq sahəsində problemin yaşandığı nəzərə çatdırılıb. Belə ki, 20 nəfərdən cəmi 2-3 nəfər işlə təmin edilib.-05C-