Qarabağ qazilərinin saytı fəaliyyətə başladı

“Qarabağ Qazilər Birliyi”nin “www.qaziler.az” saytı çərşənbə axşamından fəaliyyətə başlayıb. Bu barədə qurumun rəhbəri Etimad Əsədov bildirib.

Onun sözlərinə görə, Qarabağ döyüşçüləri belə bir saytın fəaliyyətini çoxdan istəyirdilər. Sayta rəhbərlik Qarabağ qazisi Rey Kərimoğludur.

“Qaziler.az” saytının məqsədi ölkənin ərazi bütövlüyü uğrunda gedən döyüşlərdə şəhid olan, yaralanaraq əlillik qazanan şəxslərin, onların ailə üzvlərinin, eləcə də müharibə veteranlarının problemləri, döyüş və həyat yolları haqda geniş məlumatlar verməkdir. Habelə bu sahədə dövlətin yürütdüyü siyasət haqda da məlumat veriləcəyi qeyd olunur. Sayt müharibə adamlarının öz hüquq və sosial güzəştləri haqqında daha dolğun məlumat ala bilmələri üçün maarifləndirmə işi aparmağı da nəzərdə tutur.

Saytda ordunun dünəni və bu günü, dövlətin Qarabağ probleminin həlli yönündə apardığı danışıqlar, bu danışıqların nəticələri və nəticəsi haqqında vaxtaşırı xəbərlər, analitik yazılar dərc etməyi nəzərdə tutur. Gənclər arasında hərbi vətənpərvərlik işinin təbliğ edilməsinə yardım olunmasından, döyüşçülərin problemləri, ağrı və acılarından, dövlətin bu istiqamətdə gördüyü işlərə qədər spektrin fəaliyyətinin saytda işıqlandırılması əksini tapacaq. -05D-