Pensiyalar 12 mln. manat artırılıb

Azərbaycanda əmək pensiyalarının sığorta hissəsi 1,4% artırılıb. Dövlət başçısı İlham Əliyev yanvarın 26-da bu il yanvarın 1-dən etibarən əmək pensiyalarının sığorta hissəsinin rəsmi məlumatlara görə 1,4% təşkil etmiş 2014-cü il üzrə istehlak qiymətləri indeksinə uyğun olaraq indeksləşdirilməsi haqqında sərəncam imzalayıb.

Paralel olaraq Dövlət Sosial Müdafiə Fondu (DSMF) sığorta ödəyicilərinin fərdi hesablarında yığılmış pensiya kapitalının sığorta hissəsinin məbləğini indeksləşdirəcək.

Bu gün DSMF-də təşkilatın rəhbəri Elman Mehdiyevin brifinqi keçirilib. O qeyd edib ki, pensiyaların sığorta hissəsinin artırılması üçün 2015-ci ildə 12 mln. manat tələb olunacaq.

Ekspertlərin hesablamalarına görə, əmək pensiyalarının ölçüsü orta hesabla 65-100 qəpik artacaq.

Qeyd edək ki, 2008-2012-ci illərdə “İqtisadi Araşdırmalar Mərkəzi” istehlak qiymətləri indeksinin alternativ hesablamasını həyata keçirib. Bu da, ekspertlərin fikrincə, Dövlət Statistika Komitəsini inflyasiya səviyyəsi haqqında daha həqiqətəuyğun məlumatlar verməyə məcbur edib. Məsələn, 2010-2011-ci illərdə rəsmi inflyasiya müvafiq olaraq 5,7% və 7,9% elan edilib. 2012-ci ildə İAM qiymətlərin 9,9% artdığını hesablayıb. Lakin hökumət İAM ilə “ayaqlaşa” bilməyib və 1,1%-lik inflyasiya elan edib. 2013-cü ildə rəsmi inflyasiya 2,4% təşkil edib.

2015-ci ildə Azərbaycanda əmək pensiyalarının ödənilməsi üzrə xərclər 2 mlrd. 910,5 mln. manat təşkil edəcək, bunun 1 mlrd. 370 mln. manatı pensiyaların sığorta hissəsinin payına düşəcək. -08B-